Lariosa: Namayagpag si Digong

KINSAY magdahom nga usa ka mayor sa probinsiya mahimong pamuno sa Pilipinas. Mamayagpag siya inigduaw sa mga dapit sa Pilipinas kay hugopan sa katawhan.

Sa kasaysayan sa Pilipinas o kaha sa tibuok kalibutan siya ra ang probinsiyanong mayor nga na-presidente sa nasod. Kakalit sa hitabo, matod pa nila.

Daghan nga mga kabos nga nangalipay kay ordinaryo nga tawo nga habig kanila ang na-presidente. Daghang mga milyunaryo nga nahimalingka labi na ang mga oligarch nga pildi ilang mga manok.

Si Digong hangtod karon way maayong buot kanila kinsa nagtuok sa ekonomiya sa nasod. Kon motagad man gani siya nila hapaw lamang.

Mao ni hinungdan nganong dali ra kaayo sila modip-ig sa pundok nga gustong ibton si Digong sa Malakanyang. Apan unsaon man nila pinangga ang pamuno sa militar.

Di pa dugay, dinhi ang pamuno sa Sugbo. Diyutay rang mga pulitiko nga wa makaduol niya. Kadto rang di mga sakop sa PDP-LABAN. Natural nga kahimtang.

Si Tomas ug Davide wa dapita sa pangaon sa Waterfront Hotel. Nakasabot ang mayor labi na nga kuntra sila ni Dino, ang Presidential Asst. sa Visayas nga maoy nanglista sa imbitahon.

Si Mike Rama igo lang niyang gikahinagbo ang pamuno sa hotel. Maayo ang ilang himamatay apan sa daklit lamang. Sa ingon nagpasabot nga milabay na ang kahaang sa pasangil ni Digong niya kalabot sa drug issue.

Apan si Daan Bantayan Mayor Vicente Loot gisungag gihapon ni Digong. Morag lawom ang iyang kasuko gyud kang Loot. Nagpasabot nga si Loot dunay sala gyud hangtod ron? Unfair sad.

Si Digong inilog pa gihapon sa buwangan sa katilingban. Ang sekreto niyang kahimanan mao ra gyud ang kaisog sa paggukod sa mga drug personality.

Kon molunga siya niini, molunga sad ang pagsalig sa katawhan niya nga nagdamgo og kalinaw ug kalambuan sa ilang kinabuhi nga gihamok sa sungay sa drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph