Todino: Scholar sa City Hall

SA 2,406 ka mga aplikante, 1,494 lamang ang nakapasar sa scholarship program sa City Hall.

Wala gihisgutan sa report sa Sun.Star Cagayan de Oro unsay hinungdan nganong wala dawata ang dul-on sa usa ka libo nga mga aplikanti.

Daghan ang gusto mopahimus sa program apan dili sila kwalipikado.

Lakip sa mga requirement kinahanglan naa sa top 10 graduating student ang aplikanti, dili molapas sa P6,000 ang income sa pamilya matag bulan, ug kinahanglan mopasar sa entrance examination sa kolehiya diin motungha ang aplikanti.

Basi sa report, sa kinatibuk-ang madawat, 150 niini gibasihan sa income sa pamilya, ug ang 1,306 tungod sa performance sa estudyante.

Ang City Scholarship Monitoring and Review Committee maoy responsabli nga mapatuman ang program sa epektibo nga paagi.

Pero, ambot kon gikonsiderar ba sa komitiba ang lintunganay o kaugmaon sa ilang scholar sa higayon nga makagradwar kini sa kolehiyo.

Igo lang ba kita mohatag og ayuda sa ilang pagtungha o atong alalayan sa pagpangita og trabaho ang scholar human sa graduation aron mahimong produktibo kini sa katilingban.

Gigahinan sa konseho og P60 milyones kining scholarship program. Sayang kon gamay ra ang makapahimus.

Mas maayong palapdan sa gobyerno kining programa aron daghang estudyante ang makapadayon pagtungha sa kolehiyo.

Dili ba kaha mas maayo kon ihanyag kining scholarship program sa ubang estudyante nga dili lang sa top 10 sa ilang klase.

Sa ubang nasod, ambot kon pwede ba dinhi sa atong siyudad, duna silay scholarhip program nga sama sa loan.

Gastohan nila pagpatungha ang estudyante hangtod nga makatapos og kurso. Kinahanglan hinuon magmintenar sila og taas nga grado.

Human nga mogradwar, obligado ang scholar nga moserbisyo o motrabaho sa gobyerno o pribadong kompaniya sa siyudad diin siya nanimuyo.

Pwede siya motrabaho gawas sa nasod, apan ipadayon niya ang paghatag og datadata sa loan sa City Hall nga gigasto sa iyang pagtungha.

Wa tay kwesiyon ining scholarship program, apan segurohon nato nga kapahimuslan pag-ayo sa estudyante ang maong program, ug sa samang higayon mapadayon sa gobyerno ang pagtabang pinaagi usab sa pagserbisyo unya sa scholar.

Mas maanindot man gud kon ang scholarship program molahutay nga dili magsalig og pundo kanunay sa gobyerno.

Himuon nato ba nga income-generation incentive program- nagpasabot mogasto man ugaling ta pinaagi sa insentibo sa mga estudyanti kinahanglan mokita usab ta aron masuportahan nato ang program.

Singlan nato kining mga scholar aron mabatyagan sab nila unsa ka importanti ang pagtungha kon sila mismo ang motabang na sab pinaagi sa pagsukli nila sa ilang income ngadto sa gobyerno.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph