DAKO og importansya ang ilusad nga Brigada Eskwela sa tanang tunghaan sa Northern Mindanao sa pag-abli sa klase karong Hunyo.
Kini ang gibutyag ni Department of Education (DepEd)-Northern Mindanao Director Allan Farnazo kinsa nipasabot nga importante kini kaayo labina dako kini og tabang sa hapsay ug limpyo nga pag-abli sa klase.
Preparasyon usab kini aron nga dili mausik ang oras sa mga tinun-an sa pagpanglimpyo atol sa unang adlaw sa klase.
Gihangyo sab niini ang mga magtutudlo nga padayon sa pagsabot sa mga panginahanglan sa mga tinun-an ilabi na sa pampublikong tunghaan nga mas daghan ang tinun-an nga nagkalisod sa pinansyal.
Gipasalamatan ug gidayeg sab ni Farnazo ang mga magtutudlo sa ilang mga inisyatiba nga gihimo ug dili kalimtan ang mga gipanumpaan sulod sa tunghaan.
"Mapasalamaton ako sa atong mga magtutudlo kay lisod ilang assignment. Thank you and I hope you will hold to your promise kay kamo lang ang sandiganan sa atong mga estudyante," pahayag ni Farnazo.