Ernesto D. Lariosa
San Fernando, Cebu
HUMAN matapos niya pagsuwat ang iyang nobela gibati niya nga gikumot ang iyang kalawasan sa kalapoy. Nakahunahuna siya sa suking masahista sa “Paraiso Strip.” Samtang nagsakay siya sa taksi misalida sa iyang handurawan ang katahom ni Mona. Batan-on pa kini nga gitugahag bigot nga lawas. Siya ang Star sa maong massage parlor nga daghag customer kay di pilya. daling motambayayong sa gikinahanglan sa customer. Kusog sad mangumedya.
“Belib ko nimo, Sir. Mora ka mag bakang toro.” Gitan-aw ko siya.
“Sa imong edad lig-on pa kaayo ka.” Mipuno pa.
“Kay ikaw may pares, lain pa to makatug lang ko.”
Mao tong gisuki na lang niya kay maayo kaayong momasahe. Dunay mga higayon nga mohapit siya sa parlor aron hatagag lab-as nga mga prutas ang masahista. Di siya magpamasahe. Motan-aw lang siya sa babaye gikan sa iyang gitrabahoan nga buhatan nga siya ang manedyer. Hangtod sa ngadto-ngadto nasuod ni Raul si Mona. Dihang mi-retire siya, tagsa na lang siya nga moduaw sa Paraiso Strip. Nalingaw siya sa iyang pagka-writer.
“Sir, nia na ta.” Mipahibawo ang drayber.
Mikuot siya sa iyang bulsa. Gihatag ang papel de banko. “Keep the change.”
Mipahiyom ang drayber nga midawat sa plete ug mipasirit dayon sa taksi. Sa bugnawng lawak, sa naandan naghubo siya ug gipuli ang puting customer’s dress ug dayon mihigda siya sa mahumok nga katre. Miabot si Mona.
“Uy, ikaw diay na, Sir! Mora mag kahikap og iti. Kumosta?”
Nakita niya nga naghubo dayon si Mona. “Masahe lang , Mons.”
Morag nakalitan si Mona sa iyang gisulti. “Di lang ka sa paraiso.”
Gibati gyud niya ang kakapoy sa lawas lahi sa unang panahon sa wa pa siya mo-retire. Nakita niya nga bigot gihapon ang lawas sa masahista nga misul-ob sa massage dress. Sa kamaayong momasahe ni Mona nakatug siya.
Hapit na mag-alas dose sa tungang gabii sa iyang pagmata. Dali siyang nakailis. Sa iyang paggawas nahunong siya. Sa may bridge sa hotel nagtindog ang usa ka matahom nga babaye nga nagsul-ob og massage dress. Mipahiyom niya. Giduol ni Raul. Gipaila niya ang iyang kaugalingon.
“Ako si Carla, bag-o pa ko sa Paraiso, apan nakaila ko nimo. Usa ka kabantugang magsusulat dinhi sa Sugbo.” Numero 13 ang marka sa gisul-ob sa babaye.
“Diay ba? Nganong nia ka sa gawas nga lawom nang gabii?” Mitubag kini nga igo lang siyang nagpahayahay. Mihuros ang bugnaw kaayong hangin. Mitutok ang babaye kang Raul. Unya, dugayng mihangad sa itaas. Luspad kaayo ang mga bukton sa babaye daw nakigduyog sa kahayag sa buwan nga nabantang human pagnga ang mga suga sa barandilya.
“Sir, ayaw na kang Mona, may HIV siya.” Unya, mitalikod kini nga nagdali. Nakita niya nga morag naglutaw sa hangin samtang mipadung sa unahan palayo sa Paraiso Strip. May kakulba nga milubok sa iyang dughan. Tinuod kaha ang gisulti sa babaye? Mihapit siya sa sikyu ug didto iyang nasayran nga tinuod ang gisulti sa babaye. Kadtong babaye ilang bag-ong masahista nga miambak sa hotel bridge ug namatay. Naghikog kay nataptag HIV. Nanaguto si Raul, di ra ba gyud gustog hapin si Mona kay bati. Mitindog ang sikyu morag gibati og kahadlok. Sa iyang pagbalik sa Paraiso Strip wa na niya makita si Mona. (Katapusan)