TUNGOD sa pagbangga sa usa ka trak ngadto sa pasaheroang multicab, 15 ka mga tawo ang nangaangol, usa niini grabe kagahapon sa alas 2 sa hapon sa Barangay Inoburan, dakbayan sa Naga, habagatang Sugbo.
Duha sa mga pasahero mga bata nga nagpanuigon og 2 ug 4 anyos.
Ang ten-wheeler truck (AAE 1181) nga gimaneho ni Gilbert Betonio, 46, minyo taga Caipilan, Dakbayan sa Carcar, giingong kusog nga nagdagan.
Matod ni PO2 Arnel Olmegas, traffic investigator, nga tungod sa kakusog wa na kini maka-brake, gidaro ang multicab nga gimaneho ni Junet Adorna, 44, minyo, taga Barangay Panadtaran, dakbayan sa Naga.
Ang multicab nga dunay 15 ka mga sakay dala na sa driver, nahulog sa 10 ka tiil nga giladmon sa kimba.
Sa 15 ka mga angol, ang nagrabehan giila ni Olmegas nga si Clifford Farriola, 24, taga isla sa Bantayan.
Walo sa mga angol nagpabilin sa South General Hospital samtang unom nadala ug gitambalan lang sa public clinic sa Naga samtang wa na kinahanglana pang tambalan.
Ang multicab gikan sa dakbayan sa Carcar padung sa siyudad sa Sugbo samtang nagsunod kaniya ang trak.
Si Betonio naa pa sa kapulisan sa pagsuwat ning taho kay gitanggong samtang pasakaan og kasong reckless imprudence resulting to multiple serious physical injuries and damage to property. (GPL)