UNSA gyud kahay hinungdan nga dunay kausaban sa liderato sa Senado? Nakapangtuna ko niini tungod kay kalit man god kaayo ang maong hitabo.
Human sa eleksyon sa Barangay ug Sangguniang Kabataan, misunod dayon ang balita nga dunay kausaban sa liderato sa Senado. Mikatag ang resolusyon nga gipirmahan sa mayorya sa mga Senador nga nagtuboy ni Senator Vicente Sotto III isip Senate President. Ug niadtong Lunes sa hapon, miluwat sa katungdanan si Senator Koko Pimentel dungan sa pagnominar ni Sotto nga maoy mohulip kaniya.
Kung atong sundan ang linya sa pahayag ni Pimentel, dunay kasabutan na sila nga magbahin sa termino sa pagka-Senate President sukwahi sa iyang pahayag niadtong Marso ning tuiga.
Apan nganong nahiuna man ang resolusyon nga migawas una siya miluwat sa katungdanan? Nagpasabot kaha kini nga dunay rason nganong gihulipan siya isip Senate President?
Nangutana ko niini tungod kay sa unang adlaw sa filing of certificate of candidacy sa eleksyon sa barangay niadtong Abril, duna akoy suod nga kandidato nga miingon nga human sa eleksyon, hulipan si Pimentel tungod kay nasuko kaniya si Pangulong Rodrigo R. Duterte kay wa niya napugngan
ang barangay eleksyon.
Sa sinugdan, nagduha-duha ko sa pagtuo tungod kay kaalyado sa Pangulo ang Senate President. Ug labaw sa tanan, wa ako nakadungog nga naitok niini ang Pangulo.
Hinuon, sayo niini, di buot sa Pangulo nga mahinayon ang eleksyon sa barangay tungod kay manaug gihapon kadtong mga kandidato nga giingon nga nalambigit sa gidiling druga.
Apan bisan unsaon pa sa Pangulo nga di mahinayon ang eleksyon, di kini mahimo kung di aprubahan sa Sendao ang pag-uktaba sa eleksyon.
Di sab nato mapugos ang Senado nga aprubahan ang pagsibog sa eleksyon tungod kay dunay balaod silang gisunod mao nga wa gyud mahitabo ang kagustohan sa Pangulo.
Dihang nahuman na ang eleksyon ug mikatag ang balita nga hulipan si Pimentel, akong nahinumdoman ang gisulti sa maong kandidato nga hulipan si Pimentel tungod pakyas kini nga mapugngan ang barangay eleksyon.
Kining akong gihisgutan dinhi posibleng tinuod o kaha sayop kay wa man kita nasayud sa tinuod nga hitabo.
Kon tinuod man, nadugangan ang akong pagtan-aw sa Pangulo nga usa ka result-oriented nga lider.
Basta gusto niya alang sa kaayuhan, iyang kining himuon magkinaunsan man. Di siya gusto nga hinay molihok ang iyang mga tawo. Ug labaw sa tanan, kung masuko siya nimo, tamnan ka niya og kawayan.