CEBU CITY -- Alang kang Diana Mae Memoracion, pagdaug og senior women's 800-meter run gold medal mao ang iyang regalo sa adlaw'ng natawhan ni coach Emilio Lacanaria apan ang senior men's 50-meter breaststroke champion Samuel John Alcos nadismaya nga wala mabuak ang iyang kaugalingon nga rekord.
Si Memoracion, 20, kinsa migradwar sa senior high school sa Emar Human and Environmental College, mioras og duha ka minutos ug 31.2 segundos sa Cebu City Sports Center niadtong Lunes, Mayo 21.
Kahilakon siya dihang naabot sa finish line diin naningkamot nga makaginhawa og tarong.
"Para ni kay coach Toto, gift nako sa iyang birthday today. Mao ra jud iyang gipangayo nga mag-gold, gift ra jud daw para sa iyaha," suma ni Memoracion.
Wala niya gilauman nga makadaug sa kompetisyon.
"Nagdagan ko ingon ko sa akong sarili nga kaya nako ni," sulti sa multi-titled runner sa SunStar Davao pinaagi Facebook live diin ang iyang pagdaug mao ang pagbawi sa duha ka bronze sa National Prisaa Games 2018 sa Bohol niadtong Abril.
Ang iyang pagdaug nakapasulod kaniya sa national team.
"Siguro duol na jud ni sa akong pangandoy makasulod sa national team," dugang niya.
Samtang, ang 27-anyos nga si Alcos, ang swimming instructor sa Ateneo de Davao University, mihuman og 30.97 segundos aron mohari sa boys 16-above 50m breaststroke batok Cebu City's Junvic Tiro (32.63) ug Dagupan City's Paul Andrew Rioflorido (32.88) kinsa nakaplata ug bronze sa maong han-ay.
Si Alcos, kinsa dunay rekord 29.22, miingon, "I was disappointed with my performance but as a coach I also know that these things tend to happen. Just glad I came out with the win."
Niya pa nga mao kini ang pinakadugay niya nga langoy sa event karong tuiga.