NAGPAHIMANGNO ang Bureau of Fire and Protection (BFP) Davao nga seguraduhon nga luwas ang mga wiring ug sapar ang boltahe sa kuryente una gamiton ang mga butang nga kusog mokonsumo og enerhiya aron malikay sa sunog.
Kini ang gibutyag ni Senior Fire Officer 2 Ramil Gillado, deputy chief sa Intelligence and Investigation Division sa Davao City Fire District, human maugdaw ang upat ka mga balay sa Barangay Wilfredo Aquino, Agdao District, Davao City Lunes sa hapon, Mayo 21.
Base sa inisyal nga imbestigasyon sa kabomberohan, makulang ang suplay sa kuryente dihang gigamit ang usa ka welding machine.
Nasayran nga miulbo ang kalayo gikan sa panimalay ni Bonifacio Yecla ug gilayong mikanit sa laing tulo pa ka mga balay.
"Seguraduhon gyod nato nga sapar ang watts sa kuryente nga atong gamiton didto sa watts nga ikonsumo sa atong appliances aron di ma-short ang supply," ingon ni Gillado.
Mokabat sa P200 mil ang danyos sa maong hitabo diin alas 3:57 na sa hapon gideklarang fire out. (Jeepy P. Compio)