LIMA ka mga sundalo ang naangol dihang mibuto ang improvised explosive device (IED) nga gipabusikad sa gidudahan nga sakop sa New People’s Army niadtong Mayo 21 sa Sitio Patawon, Barangay Cabuyuan, Mabini, Comval Province.
Si Captain Jerry Lamosao, Division Public Affairs Office chief sa 10th Infantry Division (ID), nagkanayon nga ang insidente nahitabo sa 10:55 sa gabii niadtong Lunes, Mayo 21.
Mga naangol sakop sa 46th Infantry Battalion sa Philippine Army.
Sila gitahasan nga magmuntar og blocking force padung sa Km 15, Barangay Cabuyoan, Mabini, Compostela Valley Province dihang naigo sa eksplosibo sa lugar.
Si Lamosao nagkanayon nga posible nga mga sakop sa Milisyang Bayan nga gipangulohan ni alyas Janu sa Guerilla Front (GF) 2, Sub-Regional Committee 2 Southern Mindanao Regional Committee.
Mga naangol, suma ni Lamosao, gihatagan dayon og tambal sa mga doktor.
Sa laing bahin, mga personahe sa Municipal Police Station uban sa mga sakop sa Armed Forces of the Philippines naglusad og follow-up investigation sa insidente ug posibleng pagkasikop sa mga rebelde.
Una ang insidente, dunay nahitabo nga engkwentro tali komunistang grupo ug militar ala 1:30 sa hapon niadtong adlawa.