Dear Noy Kulas,
Tawga lang ko sa ngan nga Anna. Akong problema mahitungod sa duha ka mga lalaki ug tomboy.
Nauyab nako ang usa sa high school pa ko, pero nagkabuwag mi kay nibalhin sila sa Manila og puyo. Pag 3rd year college nako, nakauyab ko og classmate nako ug until now, bisan nag work na ko, kami lang gihapon. Pero duna na siyay kompetensya nga nakapalibog nako.
Sa among office, naa koy nasuod nga tomboy. Lalaki kaayo siyang tan-awon mao nagtuo ko nga lalaki siya. Diha ra ko nakahibawo human siya mosulti nako. Na-develop ang akong feeling sa iyaha kay grabe mi ka suod ug kanunay sab siyang motabang nako.
Ang akong ex nagsige sab og paramdam ug moangkon ko nga naa gihapon siya sa akong heart. Pero nilang tulo,ang tomboy maoy pinakabug-at. Noy, unsa may akong buhaton? Para nako, bata pa ko nga mag serious og relationship kay 23 years old pa ko. Daghan pa ko og damgo sa akong kinabuhi nga gusto nakong kab-uton.
ANNA
Anna,
Bisan tuod kon daghan ka pang plano sa imong kinabuhi, mas maayong naa kay long term relationship kay bati man ang dinali-dali o mubo nga relasyon. Mas maayo ang dugay aron magkailhanay.
Kanilang tulo maorag nakabentaha ang kanang imong uyab since college kon kadugayon ang tan-awon. Wa man sab gud nimo gidetalye bisan gamay kon unsay dagan sa inyong relasyon ug nganong mas dunay panahon kanimo ang tomboy. Pero sa ako nang giingon, invest sa long term relationship.
Ang tomboy di ka makalaum nga makabaton ka og mga anak, kana kon ganahan ka og bata. Gawas kon okay ra nimo nga managop. Kana maoy reality. Sa imong kanhi, ex na man to. Magsugod na sab ka og relasyon nga layo man kaha siya? Duna ra bay kausaban sa mga batasan samtang magkadako ang tawo.
Sa imong uyab karon, kon bati pa siya, di tingali mo moabot og ingon niana kadugayon. Pero in the end, ikaw man ang mohukom, huna-hunaag maayo. Ilista ang maayo ug bati nila. Unya tan-awa kon kinsa ang mas maayo kanila.
NOY KULAS
(Alang sa imong problema e-mail sa kulassuper@sunstar.com.ph ug rojval69@yahoo.com)