GIKUMPIRMA ni Misamis Oriental Governor Yevgeny Vincente Emano nga ipapahawa ang iyang mga personahe sa MisOr Cares Extension Office sa Barangay Molugan, dakbayan sa El Salvador.
Gibutyag niini nga ang kanhi kapitan nga namunoan sa lungsod nga maoy nihatag og luna aron makatukod og buhatan sa MisOr Cares extension office sa maong barangay ang naparot sa karong bag-ong piliay sa Barangay Election.
"I heard nga ang new barangay captain elect nga ang MisOr Cares ang ipapahawa so that we cannot operate the extension office," matud ni Emano.
Gikasubo lamang niini pag-ayo tungod kay nasayod ang katawhan kon unsa kadako sa tabang sa iyang programang MisOr Cares sa mga nagkinahanglan.
Tungod niini, gimandoan na lamang ni Emano iyang mga sakop sa MisOr Cares sa dapit nga manghipos ug mobalhin na lamang.
"It saddened me nga gipapahawa ang atong buhatan sa Molugan. I already instructed them to pack their things and vacate the office."
Matud sa Gobernador, dili niya kinaiya ang mamugos.
Iyang girespeto ang hukom sa katawhan nga pilion ang bag-og namunoan sa nasangpit nga barangay ug walay mahimo kon paghukom sa katawhan nga hulipan ang kanhi namunoan.
"People have spoken ug ato kining respetuhon." Pahayag niini ug nasubo lamang tungod kay daghan sa dapit natabangan sa MisOr Cares labina sa programang panglawas.
Gisuwayan og kuha sa SuperBalita ang panig sa bag-ong napili sa dapit apan walay motubag sa tawag. Hinoun pabiling bukas ang mantalaan sa ilang reaksyon. (SVB)