USA ka memorandum of agreement (MOA) ang gipahigayon tali sa dakbayan sa Cagayan de Oro ubos ni Mayor Oscar Moreno ug walo ka mga tunghaan ning dakbayan.
Gipangulohan ni Moreno ang MOA signing alang sa hugot nga relasyon sa dakbayan ug mga tunghaan paghatag og maayong edukasyon.
Ang mga tunghaan naglakip sa Phinma Cagayan de Oro College, Capitol University, Lourdes College, Pilgrim Christian College, Southern Philippines College, University of Science and Technology of Southern Philippines, Xavier University, ug Liceo de Cagayan University.
Ubos sa 2018 scholarship code sa bag-ong ordinansa sa siyudad ang City Scholarships Program kong asa maghatag kinig oportunidad sa mga angayang estudyante sa dakabayan.
Anaa na sa 1,504 nga mga iskolar ang gikup-tan sa siyudad; 1,309 niini ang mga bag-ong mga iskolar, samtang 195 niini kadtong anaa na sa tulo (3) ug opat (4) ka tuig na sa kolehiyo.
Nagpasalamat si City Councilor Suzette Magtajas-Daba, chair of the Committee on Education, sa mga partner niining mga tunghaan ug gikabutyag usab nga wala pay kasiguradohan nga taman lang sa 1,309 nga mga iskolar and dawaton sa gobyerno.
"I would just like to take this opportunity of course to thank first of all ang atong mga partner academic institutions sa mga discounts nga ilahang gi-offer sa ato. So tungod sailahang mga discounts mas daghan patag ma-cater nga mga applicants nga scholars. So dili pa gyud nato ma-fix nga there's only 1,309 new scholars, pwede pa madugangan," pamahayag niini.
Dugang ni Daba, walay angay kabalak-an ang mga iskolar tungod protektado kini sila ug dili kini mawagtang ug mapulihan basta wala lang kini sila nakaangkon sa mga ginadili sa kontrata.
"As of now, with the MOA signing our scholars are protected for four years, for as long as dili sila mabagsak, wala silay na violate nga mga requirements sa grado ug unsay nakabutang sa kontrata, for four years they are protected gyud nya dili sila mapulihan og lain scholars," dugang niini.
Nagsugod matud pa ang gobyerno sa paghatag sa mga scholarship kaniadtong 1996, ubos sa administrasiyon ni Mayor Pablo Magtajas; apan usa lang kini ka klase nga scholarship.
Mahitungod sa pag-aprobar sa scholarship code, aduna nay unom (6) ka klase nga mga scholarship ang ginatanyag sa gobyerno. (Franck Dick A. Rosete, Phinma-COC intern)