SI Cebu City Mayor Tomas Osmena misaad nga hatagan og honorarium ug scholarship grants ang 640 ka mga bag-ong opisyales sa Sangguniang Kabataan (SK) nga napili dinhi sa syudad sa Sugbo sa eleksyon sa Mayo 14. “I want our future leaders to be educated,” matod pa niya.
Hapit na ra ba magpili ang mga SK chairperson sa 80 ka mga barangay sa syudad sa ilang federation president ug mga board members. Ang mapili, sama sa presidente sa Association of Barangay Councils (ABC), molingkod isip usa ka ex-officio member sa Cebu City Council.
Si Cebu City Vice Mayor Edgardo Labella nihangyo nga hatagan og kagawasan ang mga SK chairpersons sa syudad sa pagpili sa ilang mga opisyales. Sumala sa mga taho, 41 kanila mga alyado sa Bando Osmena Pundok Kauswagan, samtang 39 ang sa oposisyon.
Apan kinahanglan pa ba ang scholarship program ni Osmena? Atong tukion ang mga pribilihiyo sa mga opisyales sa SK ubos sa Republic Act No. 10742, ang “Sangguniang Kabataan Reform Act of 2015.”
Ang Section 16 (1) niini niingon nga ang tanang mga opisyales sa SK, pinili ug tinudlo, exempted sa tuition ug matrikula sa tanang public tertiary schools, lakip na sa mga state colleges ug universities ug mga public educational institutions nga gipadagan sa kagamhanang lokal.
Ang gobyerno nasyonal, pinaagi sa Department of Interior and Local Government, maoy mo-reimburse sa kolehiyo ug unibersidad sa kantidad sa tuition ug matrikula.
Gawas pa niini, ang mga opisyales sa SK nga nag-eskuyla exempted sa National Service Training Program-Civic Welfare Training Service (NSTP-CWTS) subjects. Gihatagan sab silag excuse sa pagtambong sa klase kon motambong sila sa ilang regular ug special meeting sa SK, ug ang SK chairperson, sa sesyon sa Sangguniang Barangay.
Dugang benepisyo sa mga opisyales sa SK mao ang insurance coverage ubos sa Philippine Health Insurance Corporation (Philhealth) nga abagahon sa kagamhanang nasyonal ug reimbursement sa travelling expenses.
Ang mga SK chairperson adunay samang pribilihiyo sa ubang mga opisyales sa Sangguniang Barangay kay usa man siya ka ex-officio member sa Sangguniang Barangay..
Ug alang sa kasayoran sa tanan, ang chairperson ug mga sakop sa Sangguniang Kabataan giila nga persons in authority sud sa ilang barangay, subay sa Revised Penal Code.
(edbarrita@gmail.com)