PIPILA pa lang gani ka adlaw human sa piniliay, duna nay mga kapitan sa oposisyon nga mihinayhinay nag pamali ngadto sa Bando Osmeña Pundok Kauswagan (BOPK), ang political party ni Cebu City Mayor Tomas Osmeña.
Ang bag-ohay lang mitapon sa BOPK nga kanhi sakop sa Barug Team Rama mao si Day-as Barangay Captain Freddie Esmas uban sa iyang tanang mga midaog nga konsehales.
Niadtong Biyernes, unang milayat paingon sa bandwagon sa BOPK si Guba Barangay Captain Orlan Herrera ug ang iyang mga konsehal.
Dili halayo ang posibilidad nga daghan pa unya ang mosunod, ilabi na kay nagpadayon pa gihapon og pagpanghaylo ang BOPK ngadto kanila.
Base sa sumada, moabot na ngadto sa 50 ka mga kapitanes ang kaalyado sa BOPK samtang 30 lang ang anaa sa Barug Team Rama.
Tinuod nga ang katuyoan nga makuha ang mayoriya sa mga kapitan aron nga ang mamahimong ABC president nga molingkod sa konseho ilang kaalyado.
Pero labaw sa tanan di nato ikasalikway nga kini kabahin na sa hugot nga preparasyon sa BOPK alang sa sunod tuig nga eleksiyon.
Sa sitwasyon karon, ang BOPK ubos sa solidong liderato ni Osmeña, maoy nakabintaha kay nakasugod na sila sa pagpanukad samtang ang Barug Team Rama wa pa ka porma.
Peligro pa gani nga masiak ang grupo tungod niining pag-insister karon ni kanhi mayor Mike Rama nga magpapili og balik pagka mayor bisan pa man og si Vice Mayor Edgar Labella maoy giindorso ni Michael Dino, ang presidential assistant sa Visayas nga mao usab karon ang gisandigan sa oposisyon.
Apan sa naaninaw karon, samtang solido ang lideratong gipakita ni Osmeña, mora man og wa pa tay nakita sa liderato ni Dino.
Nagkahilis na man hinuon ning iyang grupo.