GIPAHUGTAN sa Cebu City Niños ang ilang paghupot sa liderato sa pagpadayon sa Philippine National Games (PNG) kagahapon.
Base sa opisyal medal tally nga gipagawas alas 4:00 kagahapoin, ang Niños mihagdaw na og 26 ka gold, 39 ka silver ug 37 ka bronze medals.
Nagsunod sa Niños mao ang Mandaluyong City nga mikatkat sa medal tally human nakatigom og 20 ka gold, 10 ka silver ug 10 ka bronze medals.
Ang Niños nakadugang og lima ka gold medals sa athletics event gikan nila ni Melody Perez sa 3,000-meter steeplechase, Ernesto Ybañez sa decathlon, Jhuvan Jhen Baculot sa triple jump ug nila ni Seth Abraham Pilapil, Jan Menard Ayade, John Paul Apilan ug John Marvin Rafols sa 4x100 junior relay men’s.
Nakakuha sab og gold medals ang Niños sa swimming event gikan nila ni Karen Mae Indaya, Justine Reign Garrido, Razel Cabajar ug Lindsay Anne Gonzalez sa 4x50 medley relay women’s.
Ang athletics ug swimming nga gipahigayun sa Cebu City Sports Center (CCSC) hingpit na nga natapos.
Mitampo sab og gold medals alang sa Niños ang taekwondo gikan nila ni Charlotte Aquino sa finweight junior women’s division ug Jemil Tajan sa finweight junior men’s category.
Ang Baguio City natagak sa ikatulong luna nga adunay 16-25-23 gold-silver-bronze medal tally.
Naa sa ikaupat ang General Santos City nga adunay 15-18-22 medal tally ug ikalima ang Mandaue City nga adunay 12-6-7 medal tally.
Ang Cebu Province, nga nagbitay sa ika-25 nga luna sa miaging adlaw, mingsaka na sa ika-15 nga puwesto human nakatigom og 6-7-8 medal tally.
Ang Cebu Province milabni og tulo ka gold medals sa taekwondo pinaagi nila ni Melody Jane Infante sa bantamweight junior women, Mayn Yengele Coran sa lightweight junior women ug Ellen Joy Villacarlos sa welterweight junior women. (Clark Jude Suhot, CNU Comm Intern)