GIPAKITA sa Houston Rockets nga dili taphaw ang ilang pagkahimong No.1 team ug gisugakod nila ang tanang kalisod aron bawsan ang hosts Golden State Warriors, 95-92, sa Game 4 nga maoy nakatabla sa Western Conference finals series, 2-2, kagahapon sa National Basketball Association (NBA).
Ang Rockets maoy nakaputol sa 16 ka sunodsunod nga kadaugan sa defending champions sulod sa ilangg balwarte nga mao ang Oracle Arena sa Oakland, California.
Bisan gikan sila sa makakauwaw nga 41 puntos nga kapildihan sa Game 3, ang Rockets tatawng taas og moral nga ningkombati ug nakapagawas sila’g pang-alkontra sa kabangis nga gipakita sa pambatong pointguard sa Warriors nga si kanhi two-time MVP Stephen Curry.
Gipangulohan ni James Harden ang kadaugan pinaagi sa iyang 30 puntos samtang nidugang og 27 puntos si Chris Paul apan ang depensa sa Rockets hilabi na sa 4th quarter mao gyud ang nagtugpo kanila paingon sa kadaugan.
Naggukod ang Rockets og 0-12 sa sayong bahin apan hinayhinay silang ninggukod ug nasugakod sab nila ang pagbulhot sa opensa sa Warriors sa 3rd quarter sa pagpangulo ni Curry.
“We’re a team. We’re really good as a team,” batbat ni Harden.
Ang Warriors gipangulohan ni Curry pinaagi sa iyang 28 puntos samtang nidugang og 27 puntos ug 12 rebounds si Kevin Durant.
Ning maong playoffs, ang Warriors mokombati sa labing taas nilang series human nila gihuman ang nag-unang duha ka mga series sulod lang sa tag lima ka mga duwa.
Ang Game 5 motapon sa balwarte sa Rockets ugma.
“Now we’ve got to fight and really understand that this is a true playoff-type experience,” matod ni Curry, kinsa nasipyat sa iyang buzzer-beater three-point shot nga mao untay makapugos og overtime.
Naa sa Warriors ang posisyon sa bola sa nahabiling 1:27 minutos diin naggukod sila niadtong mga gutloa, 94-91. Sa usa ka talagsaong hitabo, sunodsunod nga nasipyat ang mga tirador sa gawas sa Warriors nga sila si Curry ug Klay Thompson sa ilang three-point shots.
“I thought this is the highest level we’ve ever played defensively, without a doubt,” matod ni Rockets coach Mike D’Antoni, “because we’re talking about the best offensive team ever.”
Gikan sa 12 puntos nga biya, ang Rockets hinayhinay sa pagsulbong hangtod nga nailog nila ang labaw, 85-84, pinaagi sa three-point shot ni Trevor Ariza sa nahabiling 6:03 minutos.
Nainat sa Rockets ang ilang ilang labaw sa 91-86 sa nahabiling 3:30 minutos.
Nakasikit mkan tuod pagbalik ang Warriors apan wala motugot ang Rockets nga mailog gikan kanila ang labaw hangtod na sa katapusang gutlo.
“I’m sure we’ll look at the film and kick ourselves,” matod ni Warriors coach Steve Kerr.
“Look, this is a great team we’re playing. They won 65 games for a reason.” (AP, ESL)