DAVAO DEL SUR -- Gibutyag sa mayor sa dakbayan sa Digos nga nadismaya siya human adunay mga politiko nga lantarang misalmot sa kampanya sa non-partisan unta nga Barangay ug Sangguniang Kabataan (SK) elections 2018.
Sumala ni Mayor Joseph Peñas nga dakong kalapasan sa balaod ang pagtuntong sa mga opisyal sa rally sa mga kandidato sa barangay ug SK diin nag-endorso kanila.
Mismong mga opisyal sab ang milihok aron manumod og kuwarta sa mga barangay aron masegurong modaug ang ilang gisuportahang kandidato.
Sa Barangay Kapatagan, gibutyag sa nagmadaugong si Barangay Kapitan Juanito Morales nga way nahimo ang kuwarta sa iyang mga kaatbang sa politika sanglit siya ang gibuligan sa katawhan.
Ang maguwang nga Morales maoy nipuli og dagan hulip sa iyang manghod nga si Kapitan Santiago Morales diin usa ka termino lang nga migunit sa posisyon.
Samtang sa lungsod sa Hagonoy, gitataw ni Mayor Conrado Laza nga siya mismo ang nag-monitor sa dagan sa kampanya sa ilang lungsod aron masegurong mahimong malinawon.
Gibutyag sab sa pipila ka mga molupyo sa lugar nga adunay pipila ka mga pulis nga gigamit og politiko aron mahimong guwardiya sa pagsulod sa mga barangay sa lugar.
Bisan sa lungsod sa Bansalan, giingong adunay mga nakasul-ob og sibilyan apan matud pa mga pulis kini ug nagpaaron-ingnong armado aron mahadlok ang katawhan sa barangay.
Matud sa mga mayor nga buot nilang maimbestigahan ang nahitabo niadtong panahon sa kampanya aron di na masubli ang insidente.
Si Peñas nitataw nga nabalaka siyang masubli ang insidente sa taliabot nga midterm elections diin mogamit og armado ang mga politiko atol sa kampanya aron mahadlok ang mga botante. (OBD)