DUHA ka mga college students ang nasikpaw sa Task Force Davao ug Bunawan Police Station human nagdala og 13-kilos nga pinaugang dahon sa marijuana sa ilang pagsulod sa Davao City kagahapon sa kaadlawon.
Mga suspek mao sila Shohei Figarom Kume, 21, nagpuyo sa Block 8, Lot 6, Solariega Subdivision, Talomo District, Davao City ug si Eliseo Cahero Esguerra, 20, residente sa Green Meadows, Mintal.
Sumala ni Chief Inspector Estrillo Ramiso, hepe sa Bunawan Police Station,gikan ang mga nahisgutan sa Mati City sakay sa pribadong sakyanan nga Toyota Innova.
Dihang ang TF-Davao mipahigayon og inspeksyon sa mga sakyanan nga mosulod sa Davao City, nakurat sila dihang kadudahan ang sulod sa usa ka bag.
Sa paghiling, trese ka mga binandol sa pinaugang dahon sa marijuana ang sulod nga motimbang sa 13-kilos ug dunay street value nga P15,600.
Depensa sa mga nahisgutan nga wala sila kabalo unsay sulod sa bag nga gipadala kanila hinungdan nga ilaha lamang sab kini nga gidala.
Sa kasamtangan, balhog karon sa Bunawan PNP ang mga nahisgutan kinsa kasohan sa paglapas sa Republic Act 9165 kun Comprehensive Dangerous Drug Act of 2002 didto sa korte. (JPC)