NIPAHIMANGNO ang pangulo sa Traffic Enforcement Agency of Mandaue (TEAM) ngadto sa iyang mga enforcer nga di nalang unya makigtubay sa publiko o motorista nga makiglalis nila sa karsada.
Matod ni Glenn Antigua, pangulo sa TEAM, nga mas maayong dad-on sa mga enforcer ang mainiton og ulo nga mga dinakpan sa iyang buhatan.
Kini human sa nahitabo niadtong Martes sa buntag nga nakuyapan ang enforcer ng si Julius Bate, 50, duol sa may Maguikay flyover human gilalis sa usa ka babaye nga nagpataka og labang sa dalan.
Atol sa insidente, si Bate giingong nibadlong sa usa ka babaye, kinsa nillabang sa dalan bisan nagdagan pa ang mga sakyanan ug wa pa nisiga ang go- signal alang sa pedestrian.
“Ang nahitabo, nibarog pa sa daplin si Bate unya kalit lang siya nga nakuyapan,” ni Antigua ning mantalaan.
Dugang niya nga sa pagkakaron, anaa na sa stable nga kondisyon si Bate ug wa makaangkon og dugang kadaot sa lawas.
“Di nalang ta motubay sa mga tawo nga molalis nato kay inconvenient kini sa atong trabaho. Di sad ta magpa-apekto,” awhag ni Antigua sa iyang mga enforcer.
Padayag niya nga imbes sa dalan, dad-on ang kadtong mga nakiglalis nga pedestrian o motorista sa Team office aron kini mahusay sa sakto ug bugnawng paagi.
Nihangyo sab si Antigua sa publiko nga motuman sa kon unsay balaod tungod kay igo lang nipatuman iyang mga enforcer sa balaod-trapiko ug ang gibuhat sa iyang mga kawani para sa kaayuhan sa tanan.
Nunot sa nahitabo ni Bate, si Antigua nakadesider nga ibalik ang sinemanang fitness program sa iyang mga enforcer sunod buwan.
Ang pagsayaw og Zumba sa mga enforcer kanunayng gihimo sa TEAM matag Sabado kada semana, apan si Antigua niingon nga nahunong kini niadtong Disyembre human na-busy iyang buhatan sa nagsunod nga mga dagkong kalihukan.
Ang Mandaue estriktong nagpatuman sa balaud batok sa jaywalking sa pipila ka dagkong mga karsada sa siyudad.
Gawas sa jaywalking, higpit usab nilang gidili sa mga magmotorsiklo ang pagsul-ob og taptap sa nawong, angkas man o nag-drive.
Gitumong kini sa Siyudad agi og usa sa mga paagi sa pagpahapsay sa kadalanan, taliwa sa nagkagrabeng kahimtang sa trapiko sa Metro Cebu. (JPP)