MOKABAT og 16 ka mga barangay sa Cebu City ang niuli sa ilang financial assistance nga giapod-apod City Government niadtong 2015 apan gi-disallow sa Commission on Audit (COA).
Sa 16, pito ka mga barangay ang nangayo og laing financial assistance ug niduso sa ilang proposal ngadto sa Siyudad. Ang ilang proposal gituki atol sa budget hearing alang sa gi-propose nga P469 million first supplemental budget (SB 1) ning tuiga sa executive department.
Niini nila, ang Barangays Buhisan, Capitol Site, Cogon Ramos, Kinasang-an, Pahina Central, Talamban and Tejero nangayo sa Siyudad og laing ayuda.
Ubos sa ilang proposal, ang Capitol Site gustong mopalit sa lote balor og P5.3 million alang sa ilang school building, mopalit og garbage trucks ug moayo sa ilang karsada nga balor og P2.6 million.
Ang Barangay Pahina Central gustong mopalit og security cameras balor og P3 million, mopalit og garbage truck ug moayo sa mga karsada nga dunay drainage nga balor og P5 million.
Sa usa ka interview, si Councilor Margarita Osmeña, kinsa nagdumala sa committee on budget and finance, niingon nga ang mga barangay nga ning-uli sa ilang financial assistance mahimong makapangayo og laing ayuda.
“Should the other barangays that returned but did not submit a proposal decide to submit a proposal, we can even have another supplemental budget just for them because the source of fund will be what they returned,” siya niingon.
Si Mayor Tomas Osmeña nipasaka og administratiba ug kriminal nga mga kaso batok sa 59 ka mga barangay captain sa ilang kapakyas sa paghusay sa financial assistance nga gihatag sa Siyudad tulo ka mga tuig na ang nakalabay. (RVC sa SunStar Cebu)