MORAG kabungkagon na ang oposisyon dinhi sa dakbayan sa Sugbo. Nasiak ang grupo gumikan kay mahulog nga duha na ka partido. Kini human matukod ang Barug PDP Laban nga gipanguluhan ni Vice Mayor Edgardo Labella nga gisuportahan ni Presidential Assistant for the Visayas Michael Dino. Samtang nagpabilin ang Team Rama nga ubos gihapon ni kanhi mayor Michael Rama.
Bisan ang paggamit sa pangalan sa ilang partido nagkasumpaki na sila. Gusto sa uban nga gamiton ang Barug PDP Laban apan ang uban labi pa si Rama gusto nga magpabilin kining pagatawgon og Barug Team Rama. Ang nahitabo niadtong miaging barangay ug Sangguniang Kabataan (SK) maoy klarong pasi-unang hulagway nga waa na gyud magkasinabot ang taga oposisyon.
Ang Barug PDP Laban mipadagan og silang kandidato sa pagka-barangay nga si Dino mismo ang nangunay sa pag-pili og siya usab ang mihatag og funding. Samtang si Mike Rama mipadagan usab og iyang mga kandidato isip pagpangandam sa iyang paglansar pag-usab sa sunod tuig nga eleksiyon. Aw, ang resulta pilde sila sa gidaghanon sa mga kapitan nga midaog kon itandi sa Bando Osmena Pundok Kauswagan (BOPK).
Sa resulta nga 49 por 31 sa 80 ka mga barangay pabor sa BOPK. Unsa man nahitabo? Gumikan kay ang mga botante nga mga supporters sa oposisyon naglibog naman kon si kinsa ang ilang botohan sa mga kandidato sa oposisyon. Unya solido man ang taga BOPK. Pun-an pa sa kuwarta nga gibubo sa taga BOPK alang sa pagpamalit og mga boto.
Ang barangay ug SK elections prelude kadto o pasi-unang salida sa sunod nga eleksiyon. Kon mahitabo man nga modagan gyud si Mike ug si Labella, matod pa sa taga Dalaguete, maayo pay maglana silag putot. Dili sila makadaog og magkatawa kanang tawo nga nagtungkawo karon diha sa City Hall. Mosamot ang iyang pagka-arogante ug pagka-diktador.
(bobbygnalzaro@gmail.com)