BISAN unsaon pa, di malikayan nga mahigot sa pulitika ang mga opisyal sa Sangguniang Kabataan (SK) kansang eleksyon klaro unta nga non-partisan, sama usab kuno sa barangay elections.
Apan sa tinuoray, ang duha ka mga piniliay, labina sa dakbayan sa Sugbo, masakyan sa mga pulitiko.
Sa pagkatinuod, ang mga opisyal sa barangay ug SK maoy saligan sa mga pulitiko kay duna na silay mga balwarte isip mga lider sa ilang sektor. Busa di kalikayan nga mogasto ang mga pulitiko aron sa panahon usab sa eleskyon, ila kining magamit.
Dinhi sa Cebu City, interesado si Mayor Tomas Osmeña nga makuha ang mayoriya sa SK chairmen aron mas lig-on ang ilang numero sa Konseho kay makalingkod man isip ex-officio ang mapiling presidente sa federation, sama sa mapili usab nga pangu sa Association of Barangay Councils (ABC).
Giangkon na kini ni Osmeña.
Apan ang buhatan sa Office of the Presidental Assistant for the Visayas (OPAV) nidapit sa mga SK chairmen ngadto sa Malacañang aron makigtagbo kang Presidente Rodrigo Duterte.
Niuntol si Osmeña sa gibuhat ni Presidential Assistant Michael kay nagduda siya nga pagpanghilabot kini ni Dino aron mapugngan ang pagbalitok sa mayoriya ngadto sa BOPK.
Ang duha maisip nang mortal nga managkaaway sa pulitika kay si Dino naa nagpaluyo kang Bise Mayor Edgardo Labella.
Unta, wa imbitaha ni Dino ang mga SK chairmen sa 80 ka barangays aron di maduhigan og pulitika ang pagdapit niya. Mahimo ra unta nga iyang mahuwat ang higayon nga mahuman na ang piniliay sa SK federation aron di siya mapasanginlang namulitika.
Kay sakto baya unta sila si Labella ug kaubanan, angay nga pasagdan ang kabataan sa pagpili sa ilang lider ug unsay ilang padulngan.