NAG-VIRAL sa social media ang post sa usa ka konsehala ug abugada nga mipapriso sa nanigarilyo sa usa ka beach sa probinsya sa Camiguin.
Ang post ni Atty. Frances Margaret Aparte, kinsa usa ka konsehala sa lungsod sa Mambajao, Camiguin ug abugada sa probinsya, miani og pagdayeg sa iyang pagpamadlong sa tripulante.
Ang video miabot na og 24,000 ka share sa pagsulat ning balita.
Matod sa konsehal nga namatikdan niya ang tripulante nga naa sa baybayon samtang nanigarilyo.
Ang lalawigan sa Camiguin adunay no smoking ordinance hinungdan nga iya kining gibadlong ilabi na nga nagsabak usab kini.
"I caught this man who is not from Camiguin smoking on the beach and I asked him to put it off because it's prohibited to smoke in all public places, including Coastal Areas/Beaches to prevent cigarettes butts being thrown to the sea which poses danger to Marine life and environment," matod ni Aparte.
Apan wala gihapon kini mipatuo ug mitubag pa kini sa konsehal.
"Ha? Bawal magsigarilyo? Naa moy balaod diri nga bawal? Wa man gani namadlong didto sa Manila, dinhi pa man nuon?" tubag sa tripulante ngadto sa konsehal.
Gipasabot ni Aparte ang tripulante sa regulasyon sa lalawigan apan wala gihapon kini maminaw ug mitubag tubag kini sa konsehal ug mibahad pa kini.
"Police? Asa imo police? Police ni Duterte? Tua ra man Manila ang police ni Duterte? Basin ganahan ka ilubong ta ka og buhi ron?" ang tubag sa maong lalaki human nagpadayon sa pagpasabot ang konsehal ug mibahad nga labayon kini og bato.
Nagduda si Aparte nga posibleng wala kaila niya ang lalaki nga usa siya ka konsehal ug abugada sa Anti-Smoking Task Force ug chairman sa peace and order sa maong lungsod tungod kay naka daster lang kini.
"With the power vested on me, I unveiled myself from being a mere #BarangayCoastalMaintenanceWorker to a lawyer, Anti-Smoking Task Force officer, SB chairman on peace and order and most of all a protective mother to my unborn child."
"Bahalag nabilar ning burosa ni, bahala og 4 a.m. na nakatulog mapasakaan lang ta ka og kaso to make sure you will stay in jail to teach you a lesson to abide with our local laws and most of all, to respect women, esp. Pregnant women, including those women who wear daster and bring silhig bikog." Dugang saysay ni Aparte.
Si Mayor Jurdin Jesus Romualdo, ang mayor sa lungsod sa Mambajao, nalipay sa aksyon nga gibuhat ni Aparte ug matod niini nga angayan lang masayod ang mg tawo nga dili taga Camiguin kabahin sa ilang mga balaod.
Sa pagkakaron, gawasnon na ang tripulante nga naka pyansa sa kaso niini sa Anti-Smoking ordinance.