SA di pa matapos ang summer, pahimuslan nato ang nahabiling mga adlaw sa bakasyon pinaagi sa pagpanuroy ug pagpangaligo og dagat sa lugar nga wa pa kaayo dagsai og mga turista.
Kon gusto nimo og lugar nga layo sa kasaba sa palibot, usa ang Tulang Diot nga angay nimo suroyon.
Ang gamay nga isla kay kabahin sa Barangay Esperanza, lungsod sa San Francisco, isla sa Camotes.
Bisan kon nabantog na kini nga dapit suroyanan, apan di pa ingon niana ka daghan ang mga turista nga nidagsa niini kon itandi sa ubang beach resorts nga naa sa Camotes.
Adunay tulo ka dagkong mga isla ang Camotes: Pacijan, Poro ug Ponson ug ang gamay nga isla sa Tulang.
Ang San Francisco maoy lungsod sa Pacijan, ang mga lungsod sa Poro ug Tudela maoy naglangkob sa Poro ug ang Pilar maoy lungsod sa Ponson.
Ang Tulang kay gitunga sa Tulang Diot ug Tulang Dako. Ang Tulang Dako anaa sa mainland sa San Francisco samtang tabukon og dagat ang Tulang Diot.
Sa pinulongang Sinugboanon, ang “diot” nagpasabot nga gamay.
Ang Tulang Diot, malantaw lang nimo kon magbarog ka sa Tulang Dako ug maabot nimo pinaagi sa singko minutos nga pagsakay og pump boat gikan sa Tulang Dako sa main island sa Pacijan.
Anaa sa P20 ang plite (one way) sa matag tawo nga hamtong na ug mag-agad sa sabot sa operator alang sa mga bata.
Samtang nagsakay ka sa pumpboat, makita na nimo ang semi-circular nga white sand beach sa gamayng isla.
Kon maggamit ka og drone, daw sama sa porma og kasingkasing ang isla sa Tulang Diot.
Unsay nakaespesyal sa Tulang Diot?
Gawas sa iyang puti nga bas, madani usab ka sa nagpangidlap nga tubig sa dagat sa Tulang Diot.
Laing makabihag nga talan-awon sa dapit mao ang sandbar nga tataw kaayo makita kon low tide.
Sanglit distansiya sa mainland ang gamayng paraiso, layo usab kini sa kasaba ug maka-relax ka kauban ang kinaiyahan.
Lainlaing mga klase usab sa punoan sa kahoy ang nagbarog sa isla nga naghatag og landong sa mga bisita. May mga bakhaw usab nga dugang talan-awon sa lugar.
Aduna usab lighthouse sa gamayng isla.
Kon naa na ka sa Tulang Diot, malantaw nimo ang Mt. Calvary (Kalbaryo), usa sa mga destinasyon nga dagsaon sa mga tawo panahon sa Semana Santa.
Pasilidad
Gumikan kay tabukon og dagat ang isla, way linya sa kuryente sa dapit. Ang generator ang naghatag og supply sa elektrisidad sa lugar hangtod sa alas 10 sa gabii.
Ang kahilom maoy mobaniog sa lugar panahon sa kagabhion.
Way dagkong restaurant ug hotel sa Tulang Diot. Apan mahimo kang mohangyo sa lokal nga mga molupyo nga magpaluto alang sa inyong pagkaon. Mas maayo nga magbawon mo og pagkaon.
May pipila ka gagmayng tindahan sa isla apan limitado lang ang baligya nga mga produkto sama sa chichirya, mineral water, kape, softdrinks, ilimnon, sigarilyo, kendi, ug delata nga mga pagkaon.
May tindahan usab alang sa souvenir items sama sa T-shirts ug ubang ginama nga produkto.
May paabangan nga cottages gikan sa P500 hangtod sa P600. Mahimo usab ka moabang og lamesa nga gamay sa tag P150 uban ang upat ka mga bangko, kon taas nga lamesa kay P300 ang abang uban ang walo ka mga bangko.
Inig dayon nimo og abot sa Tulang Diot, mobayad ka og P10 nga environmental fee sa in-charge sa isla.
Pletihan:
Oceanjet gikan sa Pier 1, Cebu City ngadto sa Poro Port, Camotes- P500 (one way)
Fastcraft sa Jomalia Shipping gikan Mactan, Lapu-Lapu City paingon sa Consuelo, San Francisco, Camotes – P400 (weekdays), P500 (weekends)
Barko sa Jomalia Shipping gikan sa Danao City paingon sa Consuelo, San Francisco, Camotes: Regular Economy – P180 (Aircon-200), Minor (3-10 yrs old) – P90 (Aircon- P100) Senior Citizen Economy –P145 (Aircon-160), Estudyante Economy – P150 (Aircon-P170)
Angay buhaton:
* Sabuton daan ang operator sa pump boat kon magpahuwat mo o kuhaon mo og balik paingon sa mainland.
* Pagdala daan og pagkaon ug tubig.
* Mahimo ka magdala og tent ug ipahimutang daplin sa baybayon
* Tungod kay isla ang Tulang Diot, batasana kanunay ang “Claygo” kun Clean As You Go
* Gidasig ang mga bisita nga ipatigbabaw ang ilang mga obligasyon sa pagpanalipod ug pagkonserbar sa kinaiyahan.