DUNAY bag-ong warden ang Cebu Provincial Detention and Rehabilitation Center (CPDRC sugod karong adlawa.
Moasumir na sa katungdanan karon mao si retired Police Chief Insp.Reynaldo Valmoria human sa pagpanumpa atubangan ni Gob. Hilario Davide III kagahapon sa buntag.
Sa wala pa ni-apply sa posisyon pagka-CPDRC warden, nag-serbisyo siya sa Philippine National Police (PNP) sulod sa 32 ka tuig.
Labing uwahi niya’ng assignment mao ang pagka-leader sa striking platoon sa Siquijor Provincial Police Office.
Si Valmoria nahimong responsable sa hingpit nga pagka-disqualify ni kanhi Siquijor Governor Orlando Fua Jr., paghupot ug bisan unsang posisyon sa gobiyerno, human niya kini gireklamo ug obstruction of justice sa Sandiganbayan nunot sa pagbabag niini nga dakpon ang usa ka drug suspect niadtong 2010.
Ang 57-anyos nga kanhi pulis, manghud usab sa kanhi director sa Cebu Provincial Police Office ug sa National Capital Region Police Office nga si General Carmelo Valmoria, nga una na usab niretiro sa serbisyo niadtong 2015.
Tinguha ni Valmoria nga makatampo sa paglimpyo sa provincial jail gikan sa mga kontrabando ug uban pang illegal nga mga kalihukan.
“We will try to clean up,” niingon si Valmoria.
Sa pagkakaron, moabag una kaniya ang kanhi acting warden sa CPDRC nga si Bobby Legaspi. (AZLG)