SA padayong pagsulbong sa presyo sa mga produktong petrulyo, ang mga transport group mohangyo sa administrasyon ni Presidente Rodrigo Duterte nga i-exempt sa excise tax sa petroleum products ang mga public utility vehicle (PUV).
Si Ryan Benjamin Yu, chairman sa Cebu Integrated Transport Cooperative (Citrasco), nibutyag nga maghugpong silang mga transport group sa nasod aron mopagawas og joint manifesto karong Hunyo nga manawagan sa gobiyerno nga iapil sa exemption sa excise tax ang mga PUV.
Matod niya, padayon siya nakig-alayon sa mga lider sa transportasyon sa ubang mga rehiyon aron makapagawas sila og hiniusang baruganan ug panawagan ning sunodsunod nga pagsaka sa presyo sa mga produktong petrulyo.
“Kining paggamit sa mga public utility vehicle dili ni for personal namo. Nagdagan ni sa dan for public use, maserbisyohan ang mga pasahero,” padayag ni Yu sa pakighinabi sa Superbalita Cebu kagahapon.
Mopaluyo usab sila sa panawagan sa ubang grupo sa pagsuspenso sa pagpatuman sa Tax Reform for Acceleration and Inclusion (TRAIN) 1 Law sa pag-abot na sa $80 sa matag barrel sa petroleum products.
Gawas sa manifesto, magpatabang usab sila sa mga senador ug kongresista nga mohimo og amendments sa TRAIN I Law sa higayon sugdan na og pagpatuman sa TRAIN 2 karong tuiga.
Niadtong Martes, gipausbawan sa mga kompaniya og lana sa nasod og P1.60 ang matag litro sa gasolina, P1.15 sa matag litro sa diesel samtang P1 sa matag litro sa kerosene.
Samtang, gipahibawo ni Yu nga dili na sila moduso og petition nga mangayo og umento sa pletihan sa mga public utility jeepney.
Siya nipasabot nga aduna nay nag-ung-ong nga petition nga giduso ang Basak Lapu-Lapu City Jeepney Operators and Drivers Association (Balacjoda) nga naghangyo sa Land Transportation Franchising and Regulatory Board nga himuong P12 ang minimum nga pletihan sa PUJ.
Ang LTFRB wala pay hukom sa petition sa Balacjoda.
Ang padayong pagsaka sa presyo sa mga produktong petrulyo sa kalibotang merkado nagagumikan sa pagpaminos sa Organization of the Petroleum Exporting Countries (OPEC) sa produksyon niini ug paglig-on sa dolyar batok sa peso.
Si Presidential spokesman Harry Roque unang niingon nga bukas sila sa posibilidad sa pagsuspenso sa pagkolekta sa excise tax sa oil products kon moabot na sa $80 ang matag barrel sa kalibotang merkado. (SCG)