ANG mga mamumuo lang nga nagdawatan og minimum nga suhulan ang makatagamtam og umento sa sweldo sa ipagawas unya nga desisyon sa Regional Tripartite Wages and Productivity Board sa Central Visayas.
Si Jose Tomongha, representante sa labor sector sa RTWPB 7, nibutyag nga nagkahiusa sila mga sakop sa wage board nga mohatag og adjustments sa sweldo, apan alang lang sa mga minimum wage earner nga ilang mandato.
Matod niya, base sa ilang nakita nga economic data nga gipresentar sa mga ahensiya sa gobiyerno sama sa Bureau of Agricultural Statistics (BAS), Department of Energy (DOE) ug Philippine Statistics Authority (PSA) adunay pag-irog sa mga presyo sa nag-unang mga produkto ug serbisyo.
Ang usbaw sa suhulan mahibaw-an sa dili pa saulogon sa nasod ang Independence Day sa Hunyo 12.
“Sa sunod meeting namo sa June 7 o 11 mo-come up mi og amount. So, naa nay bag-ong wage order before Independence Day,” dugang ni Tomongha dihang nahinabi sa Superbalita Cebu kagahapon.
Samtang, siya nabalaka nga daghang trabahante ang mawagtangan og trabaho sa higayon nga mapatuman na ang ikaduhang bahin sa Tax Reform for Acceleration and Inclusion (TRAIN) Law nga gipaabot masugdan karong tuiga.
Si Tomongha, chairperson sa Alliance of Progressive Labor (APL) Central Visayas, nipasabot dili lang ang mga trabahante ang maapektuhan sa Train Law kondili apil usab ang mga kompaniya kay mosaka usab ang ilang operating expenses tungod sa pagmahal sa mga palaliton, raw products ug sweldo sa mga mamumuo.
Siya nihangyo sa administrasyon ni Presidente Rodrigo Duterte nga isuspenso ang pagpatuman sa Train 2 himuon ang dugang pagtuon sa Kongreso ug Department of Finance kon makabenepisyo ba niini ang ordinaryo nga mga tawo ug konsumedor.
“I-review sa, if dunay kinahanglang amendments, i-amend nila,” dugang ni Tomongha.
Siya nidugang ang Train Law nakamugna pagsaka sa presyo sa nag-unang mga palaliton sama sa bugas ug serbisyo nga gipun-an usab tungod sa nagpadayon nga pagsaka sa presyo sa produktong petrulyo.
Sa Central Visayas, moabot og sobra sa 4,000 ang regular nga mga miyembro nga gikan sa 18 ka lokal nga unions ang mga miyembro sa APL. (SCG)