GIPANGANDAMAN na sa kapulisan sa Davao del Sur ang “Brigada Eskwela,” lakip ang “Oplan Balik Eskwela” kon diin mohimo og patrolya ang kapulisan sa siyam ka mga lungsod ug dakbayan sa Digos.
Matud ni Senior Inspector Grace Jamila de Castro, tigpamaba sa Davao del Sur Police Provincial Office (DSPPO), nga motabang ang kapulisan sa Brigada Eskwela kun School Maintenance Week nga magsugod na sa Mayo 28 hangtud sa Hunyo 2.
Mohimo pagpamintura, pag-ayo sa mga guba nga mga kagamitan ug paglimpyo sa tunghaan ang kapulisan aron mahimong kaabag sa mga ginikanan sa maong buluhaton.
Naandan na sa Department of Education (DepEd) ang tinuig nga buluhaton diin himuon ang pagpanglimpyo una moabli ang klase sa Hunyo 4.
Gitataw ni de Castro nga suportado nila ang programa sanglit dako kini og ikatabang aron nga diretso na sa ilang leksiyon ang mga tinun-an sa publikong tunghaan.
Samtang, gikanayon sab niini nga subling magtaas sa ilang alerto ang tanang istasyon human gilauman nga modagsa na sab ang tinun-an sa nagakadaiyang tunghaan sa probinsiya.
Giangkon sa kapulisan nga mas pahugtan nila ang pagbantay sa ginadiling druga aron di mabiktima sa mga tigpayuhot niini ang mga tinun-an sa high school.
Kahinumdoman nga sa miaging tuig usa ka sachet sa gituhoang shabu ang nadiskubring gibilin sa kasilyas didto sa Marber National High School sa lungsod sa Bansalan, Davao del Sur.
Gawas niini, bantayan sab sa kapulisan ang mga dautang elemento sama sa mga mangingilad ug kawatan nga mamiktima sa mga tinun-an.
Apil nga hatagan og pagtagad sa mga awtoridad mao ang paghuot unya sa trapiko. (Orlando B. Dinoy)