‘Drug pusher’ misukol, tipi

MATALAM, North Cotabato -- Patay ang usa ka drug suspect atol sa drug raid operation alas 3:15 sa kaadlawon Huwebes, Mayo 24.

Giila ang napatay nga si Jun Bacud nga molupyo sa Barangay Marbel, Matalam.

Gibutyag ni Superintendent Bernard Tayong, tigpamaba sa North Cotabato Police Provincial Office, nga gironda sa hiniusang puwersa sa Philippine Drug Enforcement Agency (PDEA)-Soccsksargen ug kapulisan ang balay ni Bacud apan misukol siya sa raiding team.

Nasayran nga gironda sa PDEA-Soccsksargen ug kapulisan ang balay ni Bacud base sa search warrant nga giisyu sa korte sa kalapasan sa Section 6 ug 11 sa Republic Act (RA) 9165, paglapas sa Section 28 sa RA 10591 ug RA 9516.

Narekober sa raiding team gikan sa suspek ang usa ka .38 revolver nga armas, mga bala ug walo ka pakite sa shabu.

Gikanayon ni Superintendent Bernard Tayong nga si Bacud anaa sa Narco-list sa PDEA-Soccsksargen nga nadakpan na niadtong miaging tuig apan nakapiyansa ug subling mibalik sa pagpamaligya sa gidiling druga.

Apan pamilya ni Bacud nanghimakak nga misukol kini sa mga pulis ug PDEA gumikan atol sa pagronda natulog siya ug walay armas nga gitipingan. (Edgar E. Fuerzas)

Related Stories

No stories found.
SunStar Publishing Inc.
www.sunstar.com.ph