Nadela: Pangandam sa pagbukas sa klase

ANG Department of Education nigahin lang ug usa ka semana sa pag-andam sa mga publikong eskwelahan alang sa pagbukas sa klase sa tuig tingtungha 2018-2019. Gitawag ni ug Brigada Eskwela nga magsugod karong Lunes Mayo 28.

Mas mubo ra ni itandi sa duha ka semana nga ilang gigahin sa niaging tuig. Sama sa naandan nanawagan sila sa mga ginikanan ug ubang ahensiya sa gobyerno, kahugpongan ug civic group pagtunol sa gikinahanglang tabang pagpatuman sa maong programa.

Ang DepEd nitahas sa mga principal pagpakiglambigit sa mga kompaniya o foundation pag-ila asa sila mahimong makatabang. Kini sanglit di man managsama ang panginahanglan sa matag eskwelahan.

Pananglit sa Agsungot Integrated School sa dakbayan sa Sugbo, matod sa ilang principal nga si Jessa Branzuela gawas sa mga ayohonon nag-una nilang panginahanglan mao ang mga pundohanan sa tubig. Tungod sa kanihit sa supply, ulan nga modagayday gikan sa mga atop sa eskwelahan maoy ilang sawron gamit ang mga pundohanan aron gamiton sa mga pansayan ug bisbis sa mga tanom.

Mao nga nagkinahanglan sila og dugang tangke ug mga baril. Pero ang malungtaron nga paagi unta aron nga di manimaho ang ilang mga kasilyas mao ang pag-ugmad ug tarong nga water system diha mismo sa barangay aron masustinihan ang panginahalan sa tubig di lang sa eskwelahan apil na ang kabalayan.

Mao ni hagit sa mga bag-ong molingkod nga opisyal sa barangay. Di lang sa Agsungot apil na ang libo ka libo ka barangay nga dugay na nga nag-antos sa dakong suliran sa supply sa tubig.

Sa tulo ka tuig nila termino bisan ang water system lang ang ilang mapatuman dako na kaayong bentaha agi ug sukli sa botos nga ilang nadawat atol sa nakalabay nga piniliay.

Gawas sa pag-ayo o pagpintura sa ubang pasilidad manghinaot ko nga ang Brigada Eskwela motutuk sab sa ubang panginahanglan sa gawas sa tunghaan. Pananglit ang mga tinun-an sa night high school nga nag-antos sa kangitngit sa ilang agianan unyag pamauli.

Ang barangay unta magpakabana ning maong panginahanglan sanglit kasagaran sa krimen nga mahitabo anha man sa mga dapit nga ngitngit. Maayo unta kung si kapitan may lista na niining mga dalan nga kinahanglan nga sug-an o maghuwat pa ta nga dunay krimen nga nahitabo.

Ang pagladlad ug mga tanod ug pulis sa mga mingaw o hilan nga dapit unta makarga ni sa listahan. Maayo natong pasalig atol sa kampanya, karon nga napili na unta tumanon ang mga saad ug di maparehas sa gibuhat sa uban nga kutob ra gyud sa pasalig. Maayo unta kung parehas ning mga bataa sa uban nga nag-eskwela sa private school ug hatod kuha pa ug sakyanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph