ASANG tam-is adto hugop ang mga hulmigas. Asa gani ang uhay adto magpanon ang mga langgam. Kay ang Sugbo maoy sentro sa edukasyon, industriya ug uyok sa patigayon hinungdan nga nagpunsisok ang katawhan gikan sa nagkalain-laing probinsya ilabina nga ang Sugbo ikaduhang siyudad sa Manila. Kuyog sa panon maong mitubo ang populasyon, problema sa trapiko, basura, krimen, squatters, talan-awon sa kakabos, uban nahimong libod-suroy o makililimos.
Bisan sulod sa mga sam-ang puy-an. Gani naproblema ang Asociascion Benebola de Cebu nga maoy nanag-iya sa Chinese Cemetery sa Carreta diin ang 4.4 ektarya nga lubnganan gipuy-an sa kapin sa 200 ka pamilya hinungdan nga ang pamilyang Insek nangayog tabang sa kagamhanan sa siyudad kay ang lubong gilungkab ug gikawat ang mahalong gipangsul-ob sa mga minatay nga mga promininting pamilyang Chinese-Cebuano gikan sa wala pa ang ikaduhang gubat sa kalibotan sama sa mga Gotianoy, Gaisano, Gothong, Ludo, Uy-Herrera, Uytengso ug Unchuan.
Gikonsiderar nga historical place ang Cebu Chinese Cemetery. Kadtong Mega Cebu Projects nga giladlad ni Atty. Winston Garcia maoy makakunhod sa mga tawo pag-anhi sa dakbayan. Isip usa ka economic ug industrial zone ugmaron ang halapad nga reclamation gikan sa Carcar paingon sa Talisay nga lagbasan sa 8-lane highway, coastal road, kuyogan sa LRT o tren gikan sa Santander padulong Daanbantayan, sal-on sa toll highway nga mosangko sa tourist destination ug economic zone sa ika-upat nga distrito nga nalakip sa master plan ni Rep. Benhur Salimbangon. Sundan sa international port sa Consolacion, tourism zone sa Cordova reclamation, New Mandaue North Reclamation ug Mactan North Reclamation and Development.
Isunod ang connecting bridges, expressways, diversion roads, railways, transcentral, trans-axial, vegetable highways, MRT, BRT, skyways, flyovers, tunnels ug uban pa sa ngalan sa kalamboan.
Magbutang og vocational schools sa matag lungsod ug siyudad sa lalawigan. Kini makadugang sa panudlanan, maminosan ang kakabos, daghang makatrabaho, makasulbad sa kahuot sa trapiko, katawhan dili na mohugpa sa siyudad sa Sugbo kay tua naman sa probinsya modatom ang ting-usbawan. Molabaw na unya kita sa Hongkong ug Singapore sa natad sa ekonomiya.
Matuman lamang ang maong mga proyekto kon dili mag-away ang mga opisyal nga gipalabi ang ilang personal nga interes. Dagkong komisyon sa mga proyekto mahiadto sa bulsa sa mga opisyal nga nagpasiugda kay mamawi sa gipamalit nga mga botos. (csa_1156@yahoo.com/0916-734-5737)