Talento: School zone

GOOD day, mga higala! Pipila ka tulog na lang magsugod na ang Brigada Eskwela diin magkahiusa ang katilingban sa pag-andam sa mga tulunghaan kay Lunes hangtud Biyernes kini adtoan sa atong nagtuon nga mga kabataan.

Paglimpyo sa palibot apil na pod og paghatag og ginagmay'ng amot aron ang eskuwelahan mapanindot.

Nagsugod na ang enrollment sa ubang dapit mao ang mga ginikanan naglinya na sa mga tindahan aron palitan og mga gamit ang ilang estudyanteng dagko apil ang mga bulilit.

Sa wala pay pang-shopping, padayon kitang mamugas, mga darling. Manudlo baya'g mga nindot nga desinyo ang atong mga iso (anak god) no? Kita pod mga ginikanan, ang kalidad baya sa produkto ang atong unang bantayan. Mas nindot ang desinyo ug kalidad- mas mahal kini mao makahubas kini sa atong gitipigang money he he!

Ang sapatos daan sa akong alaga mga 12 ang sukod, tag P5,000 kapin. Ang usa ka pares sa uniporme nga ipatahi intawon tag P750 wala pay labot sa tela, mao matag enrollment, P10,000 gayud ang ipadaplin alang lamang sa iyang gamit sa pagtuon wala pay labot ang mga libro ug ubang palaliton.

Usahay molagum gayud ning inyong miga sa pag-inutong-utong aron lang makaipon.

Bitaw, dakung alibyo na sa mga motungha sa kolehiyo kay libre na ang tuition sa mga state university and college (SUC) pinaagi sa ginama nga balaod sa atong nasud. Apan kadtong “dili kaayo utokan” nga dili makapasa sa entrance exam; mahulog gayud didto sa ubang pribadong eskuwelahan nga puwede ra balik-balikan ang suject nga mabagsakan.

Bitaw, daghang angay'ng pangandaman karong abri klase dili lang ang mga butang nga gikinahanglan sa mga estudyante apan apil na pod ang atong pagdisiplina ug pagmaymay kanila aron sila mahilayo sa bisyo (internet addiction) o disgrasya.

Atong sutaon ang mga lakaw sa atong mga kabataan bisan anaa sila sa eskuwelahan aron dili mahulog sa pamayabas ang ilang nga binuhatan. Lahi na baya ang panahon karon kay nag-una pirmi sa uso ang ilang utok, migo.

Kung dili mabantayan ug mapitol ang sayop nga binuhatan- pagmahay ra gayud ang sangputan.

Ampoan nato pirmi ang atong mga estudyante nga mahilayo sa tentasyon ug sa pagtuon sila magtinarong. Iapil nato'g ampo ang mga titser nga tagaan og gugma ug giya sa pag-umol sa pagkatawo sa ilang mga tinun-an.

Responsibilidad nato kini mga ginikanan aron mahimong malinawon ug malipayon ang kinabuhi sa atong mosunod na mga henerasyon. See you puhon!