GIMANDOAN ni Pangulong Rodrigo Duterte ang hepe sa Highway Patrol Group (HPG)-Davao Region nga si Superintendent Eliseo Malana nga pangdakpon ang mga sakyanan nga gipang-parking gikan Philippine-Japan Friendship Highway sa Panacan padung sa Ulas sa Davao City.
Kini ang gibutyag sa Pangulo niadtong Huwebes, Mayo 24, sa paghidangat niini sa Davao City sa inauguration sa Davao River Bridge Widening Project sa Carlos P. Garcia Highway, Maa, Davao City.
Gilayong gimandoan sa Pangulo ang HPG nga pangdakpon ang mga gipang-parking gumikan lagmit na nga madisgrasya ang sakyanan sa Pangulo.
Nasayran nga biyaan lamang sa mga driver ang mga bato diha sa kalsada nga ilang gigamit nga stopper sa ilang pag-parking ug makadugang sab sa guot sa trapiko sa dapit ang mga nag-parking.
Biyernes sa kaadlawon, gilayong giaksiyonan ni Malana ang mandu sa Pangulo diin mihimo sila og joint-operation uban sa Traffic Group (TG) 11 gikan Panacan padung kanto Ulas.
"Gihatagan sa nato'g warning ang naay tawo nga nag-parking pero kadtong mga naka-parking nga walay driver gibilinan natog TOP," ingon ni Malana sa pakighinabi sa SuperBalita Biyernes.
Ang convoy sa Pangulo sagad moagi sa R. Castillo Street, padung sa Quezon Boulevard, ngadto na sa Quimpo Boulevard dayon pasulod na sa balay niini sa Dona Luisa Subdivision sa Bangkal Davao City. (Jeepy P. Compio)