ANG pulis nahimong bombero human miulbo ang sunog kagahapon sa 8:05 sa buntag sa Barangay Poblacion, lungsod sa Dalaguete.
Matod ni Chief Insp. Rolan Aliser, hepe sa Dalaguete Police Station, ang iyang sakop nga si PO1 Anecito Salonoy maoy nagmaniho sa firetruck human walay driver ug walay tawo sa bomberohan dihang niulbo ang sunog.
“Wala may tawo sa bomberohan, walay mo-drive sa firetruck. Akong gimandoan si PO1 Salonoy nga siya modala. Sa pag-abot sa fire scene naabot ang duha ka fireman mao nay nipasirit sa tubig,” matod ni Aliser sa pakighinabi sa Superbalita Cebu.
Sumala ni Aliser, lima ka kan-anan ang gilamoy sa kayo.
Ang danyos gibanabana sa bombero nga P325,000.
Ang nasunog nga mga tindahan gipanag-iya sa Edmund’s Refreshment (P100,000), ni Lucy Licaros (P150,000) ug ni Rogelio Lumayag (P75,000).
Ang sunog naggikan sa kusina sa Edmund’s Refreshment stall nga sumala sa nakasaksi dunay giluto nga nabiyaan.
Matod ni Aliser, ang sunog nakontrolar alas 9:00 sa buntag.
Walay mga naangol o nalakas.
Lakip sa miresponde ang bombero sa Argao ug Boljoon. Nagamit pud ang water tanker sa PMC Mining nga nakabasi sa lungsod sa Alegria. (GPL)