DUHA ka mga barangay sa lungsod sa Asturias ang gipaubos sa state of calamity tungod sa pagsiaw sa Rice Tungro Disease (RTD), nga nakaapekto sa kapin 50 ka ektaryang humayan.
Una pa kining higayon nga nisiaw ang RTD sa maong mga dapit.
Nipasar og resolusyon ang Sangguniang Bayan sa lungsod sa Asturias niadtong Mayo 9 nga nagpaubos sa state of calamity sa Barangay Bago ug Lunas gumikan sa pagsiaw sa RTD sa mga pananum nga humay.
Daghang kahumayan ang Bago ug Lunas.
Ang RTD gitumbok nga maoy labing “destructive disease” sa humay sa Asya.
Ang mga humay nga maapektohan niini dili na makatubo. Ang mga dahon mo-yellow ngadto sa mu-orange tungod sa tungro bacilliform virus ug rice tungro spherical virus. Ang kini nga virus sagad dala sa green leafhoppers.
Sa report sa Municipal Agriculture Office sa Asturias, moabot sa 33.75 ka ektarya o 78.49% sa 43 ka ektaryang humayan sa Barangay Lunas ang naapektohan niini ug ang kinatibuk-ang 20.75 ka ektaryang humayan sa Barangay Bago.
Moabot sab sa kinatibuk-ang 66 ka mga mag-uuma sa duha ka barangay ang apektado, ilabi na kay mao kini ang nag-unang panginabuhian sa dapit.
Matod ni Asturias Mayor Jose Antonio Pintor, una kining higayon nga nisiaw ang RTD sa ilang lungsod. Unom ka buwan na kining gi-antos sa mga mag-uuma.
“Amo lang gideklarar og calamity kay wala man gyuy klaro ang harvest nila,” matod sa mayor.
Gawas sa Municipal Agriculture Office, nihimo na usab og assessment sa mga humayan sa Barangay Lunas ug Bago ang mga tinugyanan sa Provincial Agriculture Office ug Provincial Disaster Risk Reduction and Management Office.
Sa pagka-karon, dili pa makatumbok si Mayor Pintor kon pila ang pondo nga ipagawas sa lungsod aron pag-tubag sa suliran.
Nipasalig ang Kapitolyo og tabang sa higayon nga mahuman na nga assessment. (AZLG)