SA katapusang press conference sa dili pa sila magbinukbokay ibabaw sa ring, giangkon ni International Boxing Federation (IBF) Jerwin “Pretty Boy” Ancajas nga dili sayon nga kontra ang kababayang si ALA fighter Jonas Sultan.
Depensaan ni Ancajas ang iyang korona batok kang Ancajas ugma (RP time) sa Save Mart Center sa Fresno, California.
Kini maoy labing unang higayon nga mag-unay ang duha ka Pinoyng mga boksidor sa usa ka world title fight gikan niadtong Mayo 2, 1925 diin nadepensaan ni Pancho Villa ang iyang flyweight title batok kang Clever Sencio.
Basi sa taho sa www.boxingscene.com, nagkanayon si Ancajas nga ang Pinoyng mga boksidor adunay kasingkasing nga moaway hinungdan nga iyang gikonsiderar si Sultan nga lisod nga kontra.
Sa iyang bahin, si Sultan nibutyag nga mao kini ang iyang dugay nang gipangandoy ug iyang gipasalig nga buhaton niya ang tanan aron maangkon ang kalampusan.
Nidugang si Sultan nga iyang giistudyohan og maayo ang estilo ni Ancajas ug malaumon kining dili mausik ang tanan niyang paningkamot. (ESL)