NAGKUMBOYA sila si Chris Paul ug Eric Gordon aron tapakan ang dili tantong maayong duwa ni James Harden aron pasulbungon ang hosts Houston Rockets ngadto sa kulbahinam nga kadaugan batok sa defending champions Golden State Warriors, 98-94, sa Game 5 sa Western Conference finals sa National Basketball Association (NBA) kagahapon.
Ang liderato ni Paul ug ang pagdilaab sa opensa ni Gordon maoy nakahatag sa Rockets og 3-2 nga bintaha sa best-of-seven series ug nagtukmod sa Warriors ganghaan sa panamilit.
Gipangulohan ni Gordon ang kadaugan pinaagi sa iyang 24 puntos, nidugang og 20 puntos si Paul, nihatag og 19 puntos si Harden samtang nitampo og 12 puntos si Clint Capela.
Si Paul mibiya sa hinapos nga bahin sa duwa gumikan kay naangol ang tuo nga paa niini.
Anaa kaha sa saktong kondisyon si Paul sa pagpadayon sa series aron maagak ang Rockets paingon sa NBA Finals? Tan-awunon pa kini sa No.1 team sa regular season.
“His spirits aren’t great. He wanted to be out there, and for sure he’s worried ... we’ll see tomorrow how it goes,” matod ni Rockets coach Mike D’Antoni kabahin kang Paul.
Gitambalan si Paul pagkahuman sa duwa ug wala na kini nagpa-interbyu sa reporters.
Gikan niadtong 2015, mao pa lang kini ang ikaduhang higayon nga napilde ang Warriors sa Game 5 sa playoff series.
Alang sa Warriors, usa ka tanghaga ang ilang sitwasyon ning higayuna.
“We haven’t been in this position before ... so it’s a chapter we need to figure out and finish the story,” matod sa pambatong pointguard sa Warriors nga si Stephen Curry.
Ang Rockets nakaposte og 28-17 nga labaw sa sayong bahin sa 2nd quarter apan hinayhinay kining gikitkit sa Warriors hangtod nga natabla ang duwa, 45-45, sa halftime.
Human niini, grabe na kasikit ang kombati hangtod sa katapusang gutlo.
Niluagluag ang ginhawa sa Rockets dihang nakamugna sila og 95-91 sa nahabiling 1:21 minutos pinaagi sa three-point shot ni Gordon gikan sa assists ni Harden.
Segundos lang ang nakalabay ug gitubag kini’g three-point shot ni Warriors forward Draymond Green aron pahakan ang labaw, 94-95.
Sa nahabiling 10 segundos, nainat og gamay ang labaw sa Rockets, 96-94, human napasulod ni Trevor Ariza ang usa sa iyang duha ka freethrows.
Apan pa unta’y igong kahigayunan ang Warriors aron pagpugos og overtime apan sa return play, nakamugna og krusyal nga turnover si Green sa nahabiling 3.4 segundos, nga maoy nagpatigbak sa ilang poruhan.
“We was supposed to score,” matod ni Green. “I lost the ball ... not much more to it than that.”
Gipangulohan ni Kevin Durant ang Warriors pinaagi sa iyang 29 puntos, nidugang og 23 puntos si Klay Thompson samtang niamot og 22 puntos si Curry.
Ang Rockets mosuway pagtiklop sa series sa Game 6 ugma (RP time) sa balwarte sa Warriors nga mao ang Oracle Arena. (AP, ESL)