CEBU CITY -- Nibida ang unom ka Cagayan de Oro boxers alang sa kampanya sa Team CdeO pagsirado sa 2018 Philippine National Games niadtong Biyernes.
Kini human giharus nila Mark Lester Durens, John Ignatius Macas, John Paul Panuayan, Sugar Rey Ocana, Elaide Pamisa ug Jema Baja ang unom ka gold agi pagdaug sa ilang pakigsangka sa finale sa boxing nga gipahigayon sa New Cebu Coliseum.
Impresibo ang paglangkat og gold nila Panuayan ug Ocana human gipahunong nila ang ilang kaatbang sa finals.
Gipasalog ni Panuayan si Jacob Regis sa host Cebu City agi sa referee stop contest sa 2:58 minutes sa second round sa youth men lightweight division.
Natapos ni Panuayan ang away agi sa iyang kusog nga straight punch ngadto sa dagway ni Regis hinungdan gipahunong sa referee ang away.
Ni-iskor og knock-out si Ocana kontra Jerome Panganiban sa Leyte Sports Academy (LSA) sa susamang minutos ug rounds atol sa ilang elite men light welterweight nga panagsangka.
Midaog sab sila Durens, Macas, Pamisa ug Baja agi sa unanimous decision sa ilang kadaiyang kategoriya.
Gipilde ni Durens si John Paul Gabunelas nga taga Cebu City sa young men youth light flyweight division, samtang giparot ni Macas si Robert Paala sa Sultan Kudarat sa youth men flyweight division.
Nangdaug sab ang pambatong babaeng boxers nga sila Pamisa ug Baja kontra sa duha ka boxers sa LSA.
Gipukan ni Pamisa si Myra Nacario sa youth women light flyweight, samtang daug sab si Baja kang Judy Ann Orbeta sa youth women flyweight.
Nidugang sab og bronze si Jordge Nuez og bronze sa youth men flyweight division.
Sa dugang medalya, nitala na ang Team CdeO og 10 golds, four silvers ug 11 bronzes.
Sa pagkakaron, wala pa gipagawas ang final medal tally paghuman sa mga dula niadtong Biyernes.