AKONG nahinumdoman nga kaniadtong bata pa ko, dili kaayo mi nagaselebrar sa among mga birthdays. Hinuon, mahatagan lang intawon mi og baynte pesos gikan sa among mga iyaan ug uyoan. Usahay mapalitan pod og simpleng tee shirt, pantalon o sapatos. Panalagsa, maihawan og bisayang manok, o malutuan og spaghetti. Bibo pod baya.
Ang akong mga classmates tingali ang mas nakasabot sa selebrasyon matag birthday nila. Sari-saring potahe ang naa sa lamesa, naa pay ice cream, ice candy, ug uban pa. Ang tibuok klase gina-imbita, apil mga maestro ug mga maestra.
Apan, kaniadtong Disyembre 2007, adunay nahitabo kanako nga naka-utro sa akong huna-huna.
Nagkasakit ko og Aortic Aneurysm. Kining Aneurysm maoy paghubag o pagdako sa usa ka ugat sa sulod sa atong lawas, mobuto ug maghatud sa pagdugo sa sulod sa lawas (internal hemorrhage). Ang pulong "aortic" gikan sa pulong "aorta" nga maoy punoang-ugat sa kasing-kasing ngadto sa mga gagmay'ng ugat padulong sa mga parte sa atong lawas. Busa, ang akong problema mao ang paghubag (ug pagbuto) sa akong aorta.
Ang kahibulongan, mga higala, nga ako buhi pa. Mao kini ang gisulti sa doctor sa Davao Doctors' Hospital human ila kong gi-operahan. Kining operasyon nahitabo kaniadtong Disyembre 29, 2007, ug ang akong pagaw nga tingog ug hamubo nga pagginhawa maoy epekto nianang operasyon.
Ang importante, buhi pa ko hangtud karon.
Ug sukad kaniadto, lahi na ang akong panan-aw sa kinabuhi. Ako nang gipasalamatan ang Diyos sa akong kinabuhi, ug matag-Disyembre 29, ako nang ginaselebrar ang akong ikaduhang "birthday."
Matud pa ni Haring David, "tudlu-i ako, O Diyos, sa pag-ihap sa akong mga adlaw..." (Psalm 39: 4). Pinaagi sa pagselebrar nato sa atong birthday, atong gina-ihap ang atong mga adlaw, ug ginapasalamatan ang Diyos nga naghatag kanato og kinabuhi.
Kung atong huna-hunaon, puwede kita mamatay bisa'g unsang oras karon.
Sama sa ubang tawo - kalit lang nga ma-heart attack, ma-stroke, mabanggaan og sakyanan, mabangga ang sakyanan nga gisakyan... ug makutlo ang ilang kinabuhi sa kalit. Apan kita karon nga nagabasa niining mantalaan himsog pa gayud ug buhi.
Busa, magpasalamat kita nga nagapadayon pa kita og ginhawa, ug maka-enjoy sa kinabuhi nga sa ubang nag-una og pahulay, nakabsan na.
Sa panahon nga atong gina-selebrar ang atong adlaw'ng natawhan, ato pod ginapahinumdom sa atong kaugalingon nga dapat nato ampingan ang atong lawas o kinabuhi. Kay matud pa sa akong nadunggan nga ordinansa dinhi sa Davao City, ang makaabot og 100 ka tuig, makadawat og P100,000.
Halleluiah!
Kining atong sugilanon karon akong gina-dedikar sa akong higala nga nagselebrar sa iyang adlaw'ng natawhan niadtong Mayo 13. Hinaut nga imong natagamtaman ang tumang kalipay sa imong birthday; nga sa imong pagtubo, sa tabang sa Diyos mahimong smooth and easy, ug ang kaanindot sa kinabuhi pinaagi sa pagkab-ot nimo sa imong mga handom, someday you will get to see.
Akong isulti pag-usab, happy birthday. Sa pagdawat sa kaayo sa Ginoo ikaw ma-busy.