TAGUM CITY -- Gipanubayan na sa theft and robbery section sa Tagum City Police Office ang kuha sa closed-circuit television (CCTV) camera aron maila ug masikop ang mga kawatan nga misulod sa lawak sa Heroben Hometel sa Osmena Street, Barangay Magugpo West.
Subay sa journal sa Police Regional Office (PRO)-Davao Region nailhan ang biktima nga si Ophelia Caalim Delute, 27, Project Development Officer III sa Presidential Adviser on Peace Process (OPAPP) kinsa nagrenta og lawak sa nahisgutang hometel.
Nakurat na lang siya sa iyang pagmata alas 5 sa buntag wala na ang iyang mga personal nga gamit sama sa relo, Samsung Tab, smartphone ug ang iyang pitaka nga dunay P3,000 nga cash ug ang bag nga duna say P95,000 nga salapi.
Sa pagpanubay sa kapulisan, ang mga kawatan gituohang miagi sa sliding window sa maong hometel ug gipangtangag ang mga personal nga gamit sa biktima ug dakong kantidad sa kuwarta.
Ning kasamtangan mihimo pa og lalom nga imbestigasyon ang Tagum PNP aron sikupon ang mga kawatan. (Jeepy P. Compio)