ARON mas mabati sa kabataan ang usa ka makahuloganon nga kasinatian sa ilang panahon, ang Baguio Police Station, ubos sa Davao City Police Office (DCPO), mihimo og tulo ka adlaw nga Summer Youth Camp sa ilang area of responsibility (AOR) gikan Biyernes ug mahuman kini karong adlawa.
Sa Facebook post sa Baguio PNP (Philippine National Police), ilang gipakita ang aktibidad nga gisalmutan sa children in conflict with the law (CICL) sa ilang AOR nga gipangunahan sa ilang hepe, Senior Inspector Merlito Tubog.
Ang aktibidad dunay koordinasyon sa City Social Services and Development Office (CSSDO) diin mihimo sila og duwa sama sa Larong Pinoy, duna say lectures ug educational tour.
"This activity aims to give meaningful experiences to the CICL here, by engaging them into physical and mental activities and many more," sa post sa Baguio PNP.
Gituyo sab kini sa kapulisan di lamang sa Baguio PNP apan lakip na sa mga lugar ubos sa DCPO aron mabutang sa hunahuna sa kabataan nga luwas sila sa lugar nga ilang nahimutangan karon.
Dugang tumong sa aktibidad nga malayo ang kabataan sa paghimo og ilegal nga buhat ug ang paglikay sa gidiling druga.
"It will organize youth that will forward efforts for the establishment of a safer place to live with, free from the involvement in illegal activities and drug addiction," dugang pa.
Disyembre sa milabay nga tuig, giinagurahan ang bag-ong gambalay sa Women and Children's Protection Desk aron mas mapalapdan pa ang serbisyo sa kapulisan sa pagluwas sa kabataan nga anaa sa CICL ug sa pangabuso sa kababayenhan. (Jeepy P. Compio)