MITAAS ang mga insidente sa sunog sa dakbayan sa Davao og 28 porsiyento o 192 gikan Enero ngadto sa Mayo 2018 itandi sa samang panahon sa milabay nga tuig nga naa sa 150.
Gibutyag ni Senior Fire Officer 2 Ramil Gillado, deputy chief of the investigation section sa Bureau of Fire Protection Davao, nga mga insidente sa sunog karong tuiga mitaas kon diin kasagaran nahitabo sa mga "residential" nga lugar.
Kasagarang hinungdan sa sunog mao ang electrical short circuits.
Ang danyos sa propedad karong tuiga kantidad og P78,947,700 nga mas ubos itandi sa 2017, kon diin moabot og P583,389,975. Sa milabay nga tuig, ang danyos mitaas tungod sa pagkasunog sa mga dagkong mga patigayon sa dakbayan naglakip sa pasilidad sa Lapanday sa Mandug ug ang dakong sunog sa New City Commercial Center (NCCC) sa Maa.
Sayo niini, dunay gamay nga sunog miulbo sa Gaisano Mall Toril alas 10:25 sa gabii niadtong Mayo 20 apan gideklara nga napalong na alas 10:50 sa gabii nga midanyos og P100,000 kantidad sa mga propedad nga nagsugod sa ikaduhang andana sa supply room sa Human Resource. Wa hinuoy naangol o namatay sa insidente.
Ang BFP Davao aktibo sa ilang "information drive" ug nag-awhag sa publiko nga mag-igmat kanunay sa sunog ug kinahanglan dunay kahibawo sa fire hazards aron nga mapakgang ang mga insidente sa sunog nga mahitabo sa umaabot nga panahon. (JCR)