MATALAM, North Cotabato -- Siyam ka tawo ang patay sa drug raid operation sa hiniusang puwersa sa kapulisan sugod alas 11:15 sa gabii niadtong Biyernes hangtud alas 2 sa kaadlawon Sabado, Mayo 26.
Giila ang mga namatay nga sila si Terereng Salping, Burad Salping, Dadting Kasan, usa ka alyas Orong, Intan "Puti" Aban, Mauntapo Aban ug laing tulo pa nga wala pa mailhi ang bansagon.
Gibutyag ni Superintendent Bernard Tayong, tigpamaba sa North Cotabato Police Provincial Office, nga target sa search warrant nga giisyu ni Judge Alandrex Betoya sa Regional Trial Court 12 Branch 16 sila si Dadting Kasan ug Intan Aban sa Sitio Biao, Barangay Kilada Matalam gumikan sa paglapas sa Republic Act 9165 o Comprehensive Dangerous Drug Act of 2002.
Abtik nga nagpahigayon og drug raid operation ang hiniusang puwersa sa kapulisan, Philippine Drug Enforcement Agency-Soccsksargen ug militar sa balay nila Kasan ug Aban.
Apan misukol matud pa ang mga suspek ug gipabuthan ang raiding team gamit ang mga tag-as nga matang sa armas.
Napugos sa pagbalos sa pagpabuto ang mga awtoridad resulta sa usa ka oras nga sinukliay og mga bala tali sa duha ka pundok.
Pito sa mga suspek ang napatay on the spot samtang tulo ang nadala sa Babol General Hospital apan gideklara kini sa mga doktor nga namatay.
Narekober sa raiding team ang mga tag-as nga matang sa armas, shabu ug mga bala.
Sa pagsuwat ning balita, nagpadayon pa ang hugtanon nga imbestigasyon sa kapulisan ug militar sa maduguon nga anti-drug operation sa Matalam.