Florencio Pacaldo Inoc
Intramuros, Cordova, Cebu
MIKISDOM ang panagway ni Gino dihang wa niya damha ang gisulti ni Jesa kaniya.
“Magbuwag na lang ta, Gino. Gusto nakong kahatagan og katumanan ang akong mga damgo. Moadto ko sa siyudad. Gusto nakong maharuhay ang akong kinabuhi uga ang akong pamilya. Dinhi sa bukid ang sud-an kanunay lang utan nga kamunggay nga subakan og ginamos kon dili buwad. Gipul-an na ko. Busa aron way sabal, magbuwag ta!” prangka nga namahayag si Jesa.
“Apan ang tinuod, Jes, nindot puy-an dinhi sa bukid. Bisan pinobre ra ang atong panginabuhi, malinawon ta dinhi. Lahi ra sa siyudad diin ang mga tawo didto mga materyalistik, mao nga ilang buhaton bisan og dautan aron lang madato. Ang resulta, kada adlaw dunay patay. Ato bitaw na’ng mabati ug masabtan sa mga balita sa radyo. Dili ko gustong takdan ka nila, Jes. Gimahal ko ikaw ug dili ko gustong mawala ka sa akong kinabuhi. Mag-kontento lang god ta dinhi sa ato. Dili kita biyaan sa Diyos kon mosalig gyud ta Kaniya,” mibawos pagpadayag sa iyang hunahuna si Gino.
“Mag-unsa man ang atong pagsalig sa Diyos kon dili ta mangita sa atong tingusbawan?” ni Jesa.
“Matod pa ni Hesus sa iyang wali sa bukid, ‘Panid-i pag-ayo ang mga langgam. Sila wala magapugas og mga binhi o magaani o magatigom sa mga balay-tipiganan, apan sa gihapon gipakaon sila sa ilang Langitnong Amahan ug nabuhi. Dili ba kamo mas labaw pa kabililhon kay kanila?’” mikutlo og mga pulong gikan si Bibliya si Gino. “Dili ba makapadasig ang mga pulong sa Ginuo, Jes? Busa pabilin sa ato. Magpakasal ta. Anhi nato tukuron ang atong pamilya, dinhi sa malinawong bukid.” Nangaliyupo si Gino.
Apan wala gyud madala si Jesa sa Biblikanhong mensahe nga gipadayag ni Gino kaniya. Nagtuman siya sa iyang gusto, bisan sa mga kasakit ni Gino. Milarga gyud siya paingon sa siyudad. Diha sa iyang hunahuna nga mamahimo gyud siya nga dato. May katarungan siya nga mangambisyon. Usa siya sa ‘top ten’ nga mi-gradwar sa Provincial National High School ug may kaanyag sab siya. Ang iyang kaanyag maoy nakapadani kang Gino aron sila magkauyab. Apan sa pagka tinuod, lahi ang ilang tagsa-tagsa ka panlantaw sa kinabuhi.
Paglabay sa pipila ka tuig nasayran ni Gino ug sa taga bukid nga adunahan na si Jesa. Nakabana og sapiang negusyante sa siyudad. Wala na niya padaruha sa iyang uma ang iyang amahan. Iyang gi-akupar ang tanang galastuhan sa balay. Ug ang duha niya ka manghod iyang gipatungha sa siyudad. Natuman gyud ang pangandoy ni Jesa nga madato.
Apan usa ka adlaw niana nabaniog sa taga bukid nga si Jesa ug ang iyang ‘live-in partner’ misukol sa mga pulis dihang gi-ronda ang ilang panimalay kay suspek ang bana ni Jesa nga ‘drug lord.’ Sa engkuwentro nakalas ang kinabuhi ni Jesa ug sa iyang bana. Ang balita ilang nabasa sa SUPERBALITA nga dala ni Jimmy, silingan ni Gino, gikan nga nagtumod og mga utanon sa siyudad. Igo lang si Gino nga nakapanglingo-lingo. Giampo na lang niya nga unta magmalinawon ang kalag ni Jesa. (Katapusan)