ANG bakak kon balikbalikon sa liboan ka higayon mamahimong tinuod, matod pang Joseph Goebels, propagandita sa Nazi Germany panahon ni Adolf Hitler.
Ang sayop, kon balikbalikon usab og kadaghan ug pasagdan nga buhaton kanunay, mahimo usab nga sakto. Mao ni ang nahitabo sa atoang kadalanan karon. Ang sayop nga buhat nahimo nang naandan, busa nahimo nang sakto bisan sa pagkatinuod, sayop diay.
Sama nianang mga PUJ nga mohunong bisan di jeepney stop, naay karatola nga no stopping. Kanang gikan sa JY sa Lahug, sa ilang merkado padung sa Busay, kadaghan sa mga no stopping sign nga gituyo pagbutang aron kalikayan ang aksidente, daghan ang mga sakyanan nga mo-park. Naay dakong sign nga no parking.
Daghan sa mga establisemento gud diha nga way parking area o kaha di paigo ang parking area.
Di usab kini exclusive diha nianang lugara. Naay daghang mga dapit sa siyudad ug ubang area sa Metro Cebu, nga ingon usab niani. Gipasagdan na lang ni sa mga awtoridad tungod sa pressure usab sa mga pulitiko nga maoy ilang mga amo.
Korihian
Mao nga nalipay ko nga gipatuman sa Mandaue City ang estriktong traffic laws. Bisan gani sa jaywalking, ila ning gipatuman. Pero duna gihapoy manukol nga mga tawo sa mga traffic enforcer nga nanakop.
Nganong naingon man niini? Kini tungod kay sud sa dugay nga panahon, way gipatuman ang mga balaud sa trapiko. Kon gipatuman man, maorag season lang o pinili ang mga dapit diin kini gipahigayon. Busa sa dugay nga panahon, nangaanad na ang mga tawo sa sayop nga buhat. Manukol na sa mga awtoridad kon badlungon. Ang sayop gituohan nga maoy husto kay naandan.
Nakuyapan intawon ang us aka traffic enforcer sa Mandaue City kay gisuklan og pedestrian.
Balaud
Busa, kon gusto kita og hapsay nga karsada, ipatuman ang mga balaud nga maghusto sa sayop. Magkorihir sa sayop nga mga buhat. Kon ang tanang traffic bodies mopatuman sa tinud-anay sa balaud sa trapiko, madisiplina ang mga Cebuano.
Huna-hunaa ra gud, nganong sa gawas sa nasod kahibawo man nga motuman ang mga Pinoy,apan dinhi sa atoa, grabe ang paglapas ug masuko pa. Kini tungod sa attitude sa mga awtoridad. Tan-awa lagi nang sa Lahug padung sa Busay, classic na diha nga example.
Ang sayop nga buhat giisip nang husto kay ang balaud wa gipatuman, giyamayamaan lang.