NAKAUBAN ug nahimong bisita sa among mini-reunion sa CSJ-R high school batch ‘81 ang singer nga si Jo Awayan.
Sadya ug alegre ang among panagtapok nga gipahigayon sa “JJ Rise and Dine” sa Greyhound Subd., Kinasang-an Pardo.
Super lingaw ang tsika sa mga gikamingawan namong batchmates, sobrang lingaw sab ming tanan sa mini concert ni Jo Awayan.
Nakabase na si Jo sa Amerika ug may mga show usab didto ang beteranang singer.
Walay kakapoy ang Jo Awayan sa pagsayaw ug pagkanta, may mga hirit sab kining mga binuang nga gisakyan sa tanan.
Si Jo nagsugod sa dyRC, sa mga amateur singing kontes. Hangtud nga nahimong sikat nga singer sa kaulohan ug karon sa gawas sa nasud.
Apan bisdak lang gihapon ang sinulti-an ug linihukan ni Jo. Wala gyud mausab. Basta saludo gyud kong Jo.
Nahimo sab kining mini reunion nilang Jo Awayan ug mga kauban niya sa dyRC nga niduyog ug nakig-uban sab namo. Mikanta usab ang D”CEACORP members nga silang Merlin Roque, Malou Asis, Linda Ybañez Rosa, Delia Marilao, Adzer Lustre, Delia Santerna ug sa akong higalang si Baby (Babyluz) Condeno.
Salamat kang Dok Isay Caturza, sa tanang batch ‘81 labi na kang Ruth ug Gracie Cuico sa pagdala ninyo namo kang Angel ug Jo Awayan, ay’g saba!
Nakahigayon kog tan-aw sa pelikulang “Kasal” kauban akong mga momshie nga silang Sandra Año ug Leslie Abellana, kay nakuryoso sab mi kon unsa ang lahing twist nga gihimo sa istorya.
Lahi gyud nga klaseng twist ang among nasundan sa maong movie, nga dili sab nato kasarangang makita, apan tinuod gyud nga nahitabo karon.
Nindot ang estorya nga gibidahan nilang Bea Alonzo, Paulo Avelino ug Derek Ramsay.
Love story nga may sagol politika ug dinhi pa gyud sa Cebu nahitabo ang tanan.
Gibituonan sad ni nilang Vin Abrenica, Kylie Verzosa, Cherrie Gil, Christopher de Leon, Celeste Legaspi ug Ricky Davao. Makita dinhi ang mga maanindot nga dapit sa Cebu, sama sa 10,000 roses sa Cordova, Tops ug Temple of leah sa Busay, Fuente Osmeña ug uban pa.
Maayong pagkaderiher ni Direk Ruel Bayani ug showing pa gihapon ang “Kasal” sa Star Cinema.