Super Blowout: Pangandoy nga natuman

SA panuigon nga 84, abtik, piskay ang lawas ug tin-aw pa ang pandungog ni Marina Diotay-Palicte.

Niadtong Abril 30, 2018, gisaulog ni Marina ang ika-84 nga kasumaran sa iyang adlaw nga natawhan pinaagi sa yano nga salo-salo kauban sa iyang mga minahal sa kinabuhi pinangulohan sa iyang kamanghurang anak nga si Maritel.

Sa iyang birthday, panghinaot niya nga hatagan pa siya og taas nga kinabuhi ug padayong makaserbisyo sa Ginuo.

Panghinaot usab niya nga hatagan og maayong panglawas ang iyang mga anak ug apo.

Ang iyang bana nga si Eduardo Palicte Jr. nipanaw tulo ka tuig na ang nakalabay.

Sa pag-abot sa maong panuigon, alang ni Marina natuman na ang iyang mga pangandoy, usa niini ang makaabot sa Holy Land.

Nahitabo kini niadtong 2005, dihang siya ang gipakuyog sa iyang manghod nga si Msgr. Constantino Diotay nga nag-pilgrimage sa Jerusalem kauban ang 30 ka mga tawo nga gikan sa Sugbo sud sa 11 ka adlaw.

Nalibre siya sa maong biyahe kay gisaaran ang iyang igsuon nga kon makakuha kini og 10 ka tawo dunay usa nga malibre ug siya ang napilian sa igsuong pari.

Sa maong tuig, didto niya gisaulog ang iyang birthday sa Jerusalem.

“Happy jud kaayo ko, maayo na lang dili iuli diri. Ma-holy jud ka didto,” asoy ni Marina sa iyang pagbisita sa Jerusalem.

Apil sa iyang naduaw ang langub nga gilubngan ni Hesukristo, lubnganan sa Birheng Maria, Dagat sa Tiberias nga gihisgotan sa bibliya diin nakakuha og daghang mga isda ang mga apostoles human giingnan sa Ginuo nga isabyag ang ilang pukot sa tuong bahin sa sakayan, ug Dead Sea.

Si Marina mapasalamaton nga nakaabot pa siya sa pangidaron nga 84. (SCG)