NAGPAUWAN og 46 puntos si LeBron James lakip na niini ang duha ka sunodsunod nga krusyal nga three-point shots aron agakon ang hosts Cleveland Cavaliers sa 109-99 nga kadaugan batok sa Boston Celtics sa Game 6 nga maoy nakatabla sa Eastern Conference finals series, 3-3, kagahapon sa National Basketball Association (NBA).
Ang gikonsiderar nga hari sa basketball nidugang sab og 11 ka rebounds ug siyam ka assists aron ilikay ang Cavaliers sa pultahan sa panamilit ug ipugos ang deciding Game 7 sa series.
“Greatness,” matod ni Cavs coach Tyronn Lue. “Championship pedigree. Giving it his all. We needed that, especially when Kevin went down. We had to play ‘Bron as many minutes as he had to. He delivered. He was up for the challenge. He carried us home as usual.”
Sa kadaugan, si James aduna pa’y kahigayunan nga makabalik sa NBA Finals sulod sa walo ka sunodsunod nga katuigan.
Ang deciding game motapon ugma sa TD Garden diin wala nakatilaw og pilde ang Celtics sulod sa 10 ka mga duwa ning maong playoffs.
“We have one game to be able to compete for a championship, and what more could you ask for?” batbat ni James.
“If I’d have told you at the beginning of the season we only needed one game to make the NBA Finals, we’d take it.”
Ang usa sa mga pambato sa Cavaliers nga si Kevin Love gipasulod sa dugout human nagpakong ang ilang ulo ni Boston rookie Jayson Tatum ug wala na kini nakabalik og duwa.
Sa pagpadaplin ni Love, si James nakakuha og igong suporta gikan sa uban niyang mga kauban hilabi na sila si George Hill, kinsa nitampo og 20 puntos ug Jeff Green, kinsa niamot og 14 puntos.
Ang Celtics, nga nahagsa sa 1-6 nga rekord sa mga duwa ning maong playoffs nga sila ang manulong, gipangulohan ni Terry Rozier pinaagi sa iyang 28 puntos samtang nihatag og 27 puntos si Jaylen Brown.
Ang Celtics igo lang unta naggukod og pito ka mga puntos sa nahabiling tulo ka mga minutos, 92-99, apan human niini, ningmugna og 10-4 run ang Cavaliers nga gibuwakan sa duha ka sunodsunod nga three-point bombs ni James aron inaton ang ilang labaw sa 109-96 sa nahabiling 57 segundos.
Wala na nakapanghudlat ang Celtics human niini ug daw tatawng gidawat na nila ang kapildihan.
“The love of the game,” paghulagway ni James sa iyang reaksyon. “It’s a feeling you can’t explain.”
Ang Celtics nasayod nga dili sayon ang ilang sagubangon sa deciding Game 7 ug kinahanglan kini nilang pangandaman og insakto.
“It’s not going to be pretty,” matod ni Celtics guard Marcus Smart. “We’ve got to come out ready to get our nose bloody and our mouth bloody. We’ve got to come out ready to fight. You’ve got to find a way, whatever it takes.”
Wala pa’y klaro kon makaduwa si Love sa Game 7 ug mao sab kini ang angayang pangandaman sa Cavaliers.
Kinahanglang susihon pa ang pagkaangol sa ulo ni Love kon kon masuta nga kinahanglan kining mopahuway, dili siya makaduwa sa Game 7 basi sa lagda sa NBA. (AP, ESL)