NIDUSO og P10 nga minimum nga pletihan sa unang upat ka kilometro ug P1 sa mosunod nga matag kilometro ang Philtram Transportation Consortium Inc, (PTC) subay sa feasibility study sa Systra Philippines Inc.
Kini ang gibutyag ni Konsehal Jerry Guardo, chairman sa committee on infrastructure sa konseho, dihang ang mga opisyal sa PTC nakigtagbo kang Mayor Tomas Osmeña kagahapon sa buntag didto sa Office of the Mayor.
Si Osmeña sa iyang bahin nagkanayon nga ila unya nga susihon ang tanyag sa PTC nga gipangulohan ni Domingo So Peñaloza human ila kining maduso ngadto sa Department of Transportation (DOTr).
Ang mayor unang nipadayag sa iyang kabalaka kon ang mamahimong pletihan sa monorail sobra kataas ug dili maka-afford ang mga Sugbuanon sa ilang inadlaw-adlaw nga pagsakay.
Apan natubag kini diha nasuta sa pagtuon nga dili diay mahal ang mamahimong pletihan sa mga sumasakay sanglit labaw lang kini og diyutay sa pletihan sa mga public utility jeepney.
Nakauyon si Osmeña sa proyekto sa PTC sanglit gawas nga ang ilang proyekto adto mag-agi sa ibabaw nga bahin ug dili makamugna og kahuot sa trapiko, ila usab gitinguha nga dili kini makigkompetinsya sa Bus Rapid Transit nga gimatuto ni Osmeña.
Subling gipikha sa mayor si Secretary Michael Dino sanglit gusto sa alter ego ni Presidente Rodrigo Duterte nga ipatuman ang Light Rail Transit (LRT) sa Cebu ug papason ang BRT gumikan usab sa kahagip-ot sa mga karsada gawas lang sa Osmeña boulevard nga maoy ilang rota.
Si Guardo nagkanayon nga gikan sa dakbayan sa Talisay, moagi sa N. Bacalso ang monorail ug posible nga mohapit kini sa South Road Properties, balik paingon sa Calamba ( V. Rama) B. Rodriguez, Fuente Osmeña, North Reclamation area, Mandaue City ug lahos sa lungsod sa Consolacion.
Niining bag-o, ang City Government nitugot sa Systra Philippines Inc., nga makahimo og pagsusi sa mga yuta (soil test) nga maoy subayon sa monorail aron ilang mahibaw-an ang kalig-unon sa ilang umaabot nga foundation.
Gawas sa Cebu City, kinahanglan usab nga makig-alayon ang Philtram ug Systra didto sa LGU sa Talisay, Mandaue ug Consolacion. (PAC)