NIREKOMENDAR ang Mandaue City Legal Office (MCLO) ngadto sa Sanguniang Panlungsod nga mohimo og ordinansa kalabot sa proseso sa pagsira ug pag-abli og usab sa mga establisamento sa dakbayan.
Kini maoy gipaambit ni Atty. James Allan Sayson sa Superbalita Cebu sayo ning semanaha.
Ang rekomendasyon sa CLO gihimo human nga gitugutan nga maka-operate pag-usab ang MO2 Restobar sa North Reclamation Area.
Kahinumduman nga kontrobersyal nga pagpasira ni Mayor Luigi Quisumbing niini niadtong Enero nunot sa nahimong kalapasan sa paghimo og kalihukan atol sa Sinulog nga way saktong permit gikan sa city hall.
Lakip sa gipasirad-an ni Quisumbing niadto mao ang The Sentral ug Club Hatchi nga parehong nihimo’g susamang kalapasan, gawas niini, nasuta sab sa dakbayan nga taas ang mga kaso sa physical injuries sud sa duha ka mga bar diin nalambigit sa pagpangulata mao ang bouncer ug mismong tag-iya pa niini.
Mga hinapos sa Marso, ang MO2 nipadala og suwat sa dakbayan nga irekonsiderar niini ang closure order nga gipahamtang batok nila.
Nihimo og timbangtimbang ang CLO kalabot sa hangyo ni MO2 ug nihimo sila og rekomendasyon sanglit nangayo man kini og pasaylo ug di nila sayop nga wa sila nilukat og permit. (JPP)